Қазақстан құрамасының қорғаушысы Ян Вороговский «Астанамен» келісімшартты тағы екі жылға ұзарту туралы уағдаласты. Бұл туралы 15 қарашада дереккөзге сілтеме жасап AmanVIBE хабарлады. Клуб пен ойыншының өзі бұл ақпаратты әзірге ресми түрде растаған жоқ.
Вороговскийдің астаналық клубпен қазіргі келісімшарты 2026 жылдың соңына дейін жасалған, сондықтан маусымаралықта ол еркін агент ретінде кетуі мүмкін еді. Күзде қорғаушының есімі ел чемпионы «Ордабасымен» байланыстырылды, алайда сол кезде қазақстандық БАҚ-та оның Шымкентке ауыспайтыны және «Астанада» қалатыны туралы ақпарат шыққан. Енді AmanVIBE деректері расталса, оның болашағы тағы екі маусымға шешілмек.
КПЛ-2026 маусымында Вороговский «Астана» сапында чемпионаттың 30 ойынының бәрінде алаңға шығып, екі гол соқты және төрт нәтижелі пас берді. Астаналық команда 54 ұпаймен үшінші орын алды. Transfermarkt қорғаушыны 600 мың еуроға — шамамен 295 млн теңгеге бағалайды.
Вороговский «Астанада» 2023 жылдың жазынан бері ойнап келеді — ол сол кезде астаналық клубқа бельгиялық «Моленбектен» ауысқан.
