Түркия Президенті Режеп Тайып Ердоған мен Катар Әмірі шейх Тамим бен Хамад Әл Тани 13 қарашада, жұма күні, Стамбұлда өзара қорғаныс келісіміне қол қойды. Келіссөздер қорытындысы бойынша жарияланған бірлескен мәлімдемеге сәйкес, елдердің біріне сырттан қарулы шабуыл жасалса, екеуі біртұтас ұстаным танытады.
Келісім бойынша Анкара мен Доха қауіпсіздігіне қатер төнгенде өзара кеңесіп, қорғаныс саясатын, өңірдегі және әлемдегі жағдайды бірге талқылайды. Тараптар бірлескен әскери жаттығуларды жиілетуге, қорғаныс өнеркәсібіндегі ынтымақтастықты дамытуға және әскерилерді оқыту бойынша алмасуға келісті. Мәлімдемеде келісім екі елдің егемендігі мен аумақтық тұтастығын қорғауға бағытталғаны айтылған.
Құжатқа Долмабахче сарайында өткен Түркия–Катар Жоғары стратегиялық комитетінің 12-отырысында қол қойылды. Онда барлығы бес құжат бекітілді: қорғаныс келісімінен бөлек білім беру саласындағы келісім, тұтынушылар құқығын қорғау және нарықты қадағалау туралы, бейбітшілік, татуласу және қақтығыстарды реттеу туралы меморандумдар, сондай-ақ комитеттің бірлескен мәлімдемесі.
Түркия Президенті әкімшілігінің Коммуникация басқармасы хабарлағандай, Ердоған келісім екі ел қатынасына «жаңа өлшем» қосатынын, ал қорғаныс өнеркәсібі мен энергетикадағы ынтымақтастық кеңейе беретінін айтты. Оның сөзінше, Түркия мен Катар Парсы шығанағында соғыс қайта тұтанбауы үшін бірге жұмыс істеуді жалғастырады. Катар Әмірі келісімді стратегиялық әріптестік деп атады. Ол X әлеуметтік желісінде тараптар қол жеткізген нәтижені қалай дамытуды және алдағы кезеңде бірге қандай міндеттерді шешетінін талқылағанын жазды.
Келісім АҚШ пен Израильдің Иранмен соғысы Шығанақ елдеріне де әсер етіп жатқан тұста жасалды: осы аптада Иран Бахрейндегі америкалық радарға соққы бергенін мәлімдеді (АҚШ мұны жоққа шығарады), ал йемендік хуситтер Сауд Арабиясына шабуыл жасап жатыр. Түрік әскерилері Катарда 2015 жылдан бері орналасқан. Тамызда Түркия, Сауд Арабиясы мен Пәкістан Меккеде қорғаныс пактісіне қол қойды: оған сәйкес бір елге жасалған шабуыл барлығына жасалған шабуыл саналады, Түркия парламенті оны өткен аптада ратификациялады. Қазанда Катар, Түркия, Пәкістан және Индонезия Дохада «Бадр» деп аталатын қорғаныс ынтымақтастығы туралы меморандумға қол қойды.
