2027 жылғы 1 қаңтардан бастап мемлекет бала бір жарым жасқа толғанға дейін оның күтіміне байланысты төлем алатындардың зейнетақы жарнасына қосымша қаражат төлемейді. Бұл 2026 жылғы 11 маусымдағы № 306-VIII заңда бекітілген: Әлеуметтік кодекстен бюджеттік субсидиялар туралы 87–89-баптар алынып тасталды. Бұл туралы Enbek.kz порталына сілтеме жасап, Uchet.kz хабарлады.
Қазір бала күтіміне арналған төлем соңғы 24 айдағы орташа айлық табыстың 40%-ын құрайды, одан 10% міндетті зейнетақы жарнасы ұсталады. Бұрынғы жалақыдан төленетін жарнаға дейінгі айырманы бюджет толықтырып отыр, сондықтан БЖЗҚ-дағы шотқа декретке дейінгідей сома түседі.
Мысалы, табыс 500 мың теңге болса, төлем 200 мың теңге, ал одан ұсталатын жарна 20 мың теңге болады. Қазір мемлекет оған тағы 30 мың теңге қосады, сөйтіп БЖЗҚ-ға айына 50 мың теңге түседі. 2027 жылдан бастап тек 20 мың теңге қалады — бұл 60%-ға аз. Бір жарым жылдық декрет ішінде жинақ 540 мың теңгеге кем түседі.
Өзгеріс қазір субсидия алып жүргендерге де қатысты. Заңға сәйкес, 2027 жылғы 1 қаңтарға дейін тағайындалған бюджеттік субсидияларды төлеу де сол күннен бастап тоқтатылады. Яғни 2026 жылы декретке шыққан ата-аналарға да қосымша төлем келесі жылдың басынан берілмейді.
Болашақ зейнетақы үшін бұл жинақтың азаюын білдіреді: түспей қалған жарна мен оған есептелетін инвестициялық табыс кейін қайтып келмейді. Айырманы тек ерікті зейнетақы жарнасы арқылы толтыруға болады.
Бала күтімімен өткен кезең бұрынғыдай зейнетақы жүйесіне қатысу өтіліне есептеледі — әр балаға үш жылға дейін, барлығы 12 жылдан аспайды. Бұл кодекстің 206-бабында көзделген. Базалық зейнетақының мөлшері осы өтілге байланысты.
2027 жылдан бастап бала күтіміне арналған төлемнің өзі де өзгереді: ол анаға бекітіледі және ана жұмысқа мерзімінен бұрын шықса да сақталады.
