Ұлыбритания 12 қарашада Ресейге қарсы жаңа ауқымды санкциялар топтамасын жариялап, Ресейдің мұнай өндіретін ең ірі он компаниясының бәріне шектеу енгізген алғашқы ел болды. Жаңа басты нысана — «Славнефть». Басқа алпауыттар, соның ішінде «Роснефть» пен «Лукойл», сондай-ақ құбыр операторы «Транснефть» британдық санкциялар тізіміне бұрын енген еді. Топтама Лондонда еуропалық көшбасшылар Еуропалық саяси қоғамдастық саммитіне Дублинге жиналған күні жарияланды.
«Славнефтьтен» бөлек, тізімге «Роснефтьтің» Арктикадағы «Восток Ойл» мұнай жобасы, Ресейдің ең ірі көмір компаниялары — «Кузбассразрезуголь» мен Сібір көмір энергетикалық компаниясы (СУЭК), «НИПИгазпереработка» инжиниринг компаниясы және БАӘ-дегі үш сауда фирмасы — Forteza Trading, Novus Energy және Patera енді. Ресей мұнайы мен сұйытылған газын тасымалдайтын көлеңкелі флот кемелері де санкцияға ілікті. Көлеңкелі флот дегеніміз — иелері белгісіз ескі танкерлер, Ресей солар арқылы мұнай сатуға қойылған батыстық шектеулерді айналып өтеді. Тізімге қанша кеме енгені нақтыланбады. Британ үкіметі жаңа шаралар Ресейдің «энергетикадан түсетін табыс тізбегінің әр буынына дерлік» — өндірушілерден бастап саудагерлерге, жеткізушілер мен танкерлерге дейін соққы беретінін мәлімдеді.
Мұнай мен газ сату — Ресейдің Украинаға қарсы соғысты қаржыландыратын басты көзі. «Украина жөніндегі бейбіт келіссөздер алға жылжыды, бірақ қазір бейқам отыратын уақыт емес», — деді Ұлыбритания премьер-министрі Энди Бернем. Оның сөзінше, толық әрі дереу атысты тоқтатуға қол жеткізу үшін Лондон Ресейдің мұнайдан түсетін табысына қысымды әрі қарай күшейтуі керек.
Мәскеуге қарсы жаңа шектеулерді Еуропалық одақ та әзірлеп жатыр. 16 қарашада, дүйсенбіде ЕО елдерінің сыртқы істер министрлері Ресейде жұмыс істейтін 50 банкке санкцияны түпкілікті бекітуі тиіс. Ал Еуропалық комиссияның төрағасы Урсула фон дер Ляйен Ресейге қарсы 22-санкциялар топтамасын және Украинаға арналған қаржы жоспарын 26 қарашаға дейін ұсынуға уәде берді.
