2027 жылғы 11 қаңтардан бастап Еңбек және халықты әлеуметтік қорғау министрлігі пилоттық жобаны іске қосады: кейбір әлеуметтік төлемдер отбасының нақты әл-ауқатын ескеріп тағайындалады. Жаңа тәсіл әлеуметтік төлемдердің 36 түрінің 12-сіне қатысты. Ол әл-ауқатты бағалау кезінде отбасы «жоғары» немесе «ауқатты» деңгейге жатқызылған төлем алушыларға әсер етеді. Бұл туралы Еңбекмині хабарлады.
Министрлік мұның не үшін қажет екенін түсіндірді. Қазіргі тетіктер төлем алушының қолында шын мәнінде қанша қаражат бар екенін әрдайым көрсете бермейді. Сондықтан табысы жоғары отбасылар кейде қиын жағдайдағы адамдармен бірдей көмек алады. Пилоттың басты идеясы — кейбір төлемдердің мөлшері мен түрі отбасының нақты қажеттілігі мен мүмкіндігіне сай болуы тиіс, ал бюджет қаражаты ең алдымен көмекке шынымен мұқтаж адамдарға жетуі керек.
Сонымен бірге Еңбекмині мемлекет әлеуметтік міндеттемелерінен бас тартпайтынын атап өтті. Пилот барысында азаматтардың құқығын қорғауға, отбасының әл-ауқатын әділ бағалауға және адамдарды қолдаудан негізсіз айырмауға назар аударылады. Алдымен қазіргі төлем тетіктерінің қалай жұмыс істейтіні тексеріліп, өзгерістердің салдары бағаланады.
Жұмысты министрлік жанындағы жобалық кеңсе үйлестіреді. Оның құрамына Президент Әкімшілігінің, Үкімет аппаратының, Құрылтайдың және сарапшылар қауымдастығының өкілдері енеді, тәуелсіз мамандар да тартылады. Кеңсе ұсынылған тәсілдерді зерделеп, әлеуметтік және экономикалық салдары мен тәуекелдерін есептейді, содан кейін ұсынымдар әзірлейді.
Өзгерістер кезең-кезеңімен енгізіледі. Пилот аяқталған соң министрлік қолдау жүйесін одан әрі қалай өзгерту жөнінде ұсыныстар дайындайды. Жобаға нақты қай 12 төлем кіретіні және әл-ауқат қандай өлшемдермен бағаланатыны министрлік хабарламасында айтылмаған.
Еңбекмині атаулы қолдау туралы күзден бері айтып келеді. Бұған дейін ведомство Отбасының цифрлық картасы бойынша A және B санатына жатқан отбасылар 2027 жылдан бастап ала алмайтын жәрдемақының 10 түрін атаған еді. Олардың қатарында бала туғанда, бала күтімі бойынша және көпбалалы отбасыларға берілетін жәрдемақылар бар. Қазан айында еңбек министрі Асқарбек Ертаев мемлекеттік жәрдемақыны 3,2 млн-ға жуық адам алатынын айтқан: олардың 77 мыңы A санатына, тағы 475 мыңы B санатына жатады. Қазаннан бері 729 қазақстандық eGov арқылы төлемнен өз еркімен бас тартты. Отбасы санатын eGov Mobile-дағы калькулятор арқылы алдын ала тексеруге болады.
