Канада үкіметі Hockey Canada мен Халықаралық хоккей федерациясына (IIHF) ресейлік хоккейшілерге жастар арасындағы әлем чемпионатына қатысу үшін виза бермейтінін хабарлады. 20 жасқа дейінгі ойыншылар бақ сынайтын бұл турнир 26 желтоқсанда Эдмонтон мен Ред-Дирде басталады. Бұл туралы комментатор Горд Миллерге сілтеме жасап канадалық TSN хабарлады. Тыйым Канада хоккей лигасында ойнайтын әрі визасы бар ресейліктерге де қатысты: олар турнирге тіпті бейтарап ту астында да шыға алмайды.
Ресей турнирге спорт арбитражының шешімінен кейін қайтарылды: 30 қазанда CAS IIHF-ті ресейлік командаларды жарыстарға жіберуге міндеттеді. TSN мәліметінше, Норвегия федерациясы IIHF Ресейді турнирге Норвегия құрамасының орнына қосатынын хабарлаған. Канада премьер-министрі Марк Карни өткен аптада-ақ соғыс жүріп жатқанда Ресей мен Беларусь спортшылары Канадада өз елдерінің атынан өнер көрсете алмайтынын мәлімдеген. Спорт жөніндегі мемлекеттік хатшы Адам ван Кёверден бейтарап мәртебе командаларға емес, жекелеген спортшыларға ғана қатысты екенін нақтылап, былай деді: «Премьер-министр спорт Канада жерінде насихат үшін пайдаланылмайтынын барынша анық жеткізді».
Мәскеу шағыммен жауап берді. Ресей хоккей федерациясының президенті Владислав Третьяк «ФХР IIHF-тің әдеп кеңесіне мән-жайды анықтап, сол федерацияларды жазалау талабымен сұрау жолдады» деп мәлімдеді. Бұл Ресей құрамасымен матчтарға бойкот жариялауға шақырған федерацияларға қатысты, деп хабарлайды ТАСС. Сонымен қатар ФХР IIHF-тен ресейлік команданың Канададағы турнирге қатысуын қамтамасыз етуді немесе чемпионатты басқа елге көшіруді сұрап отыр. Агенттік мәліметінше, жеті ұлттық федерация Ресей құрамасы қатысатын матчтар кестесіне қол қоюдан бас тартқан.
Ресейде одан да қатаң үндеулер айтылып жатыр. Ресей Олимпиада комитетінің бұрынғы президенті Александр Жуков Канаданы жастар арасындағы әлем чемпионатынан айыру керек деп санайды, ал Мемлекеттік Дума депутаты Светлана Журова турнирді Канаданың орнына Ресей өткізе алатынын жоққа шығармайды.
Ресей мен Беларусь 2022 жылдан бері IIHF турнирлеріне қатыспай келеді. IIHF CAS шешіміне наразылығын білдірді, ал бірқатар еуропалық федерация ресейліктерге қарсы мұзға шықпайтынын алдын ала мәлімдеген. Қазақстан хоккей федерациясы бұған дейін Ресейге қарсы бойкотты қолдайды деген ақпаратты жоққа шығарған.
