Жетісу облысындағы Текелі қалалық соты 12 қарашада 41 жастағы жергілікті тұрғын әйелді күйеуінің өліміне кінәлі деп танып, оны сот залынан босатты. Әйелге қауіпсіздігі барынша төмен мекемеде өтеу арқылы бір жылға бас бостандығынан айыру жазасы тағайындалды, бірақ сот бірден рақымшылық қолданды.
Әйел ҚК-нің 106-бабының 3-бөлігі бойынша, яғни адам өліміне әкеп соққан денсаулыққа қасақана ауыр зиян келтіргені үшін айыпталған. Прокуратура оған тоғыз жыл бас бостандығынан айыруды сұраған. Жетісу облыстық сотының баспасөз хатшысы Нұрсұлтан Орынбасаровтың айтуынша, сот оның әрекетін ҚК-нің 112-бабының 2-бөлігіне қайта саралады. Бұл бап қажетті қорғаныс шегінен шығып, денсаулыққа ауыр зиян келтіру абайсызда адам өліміне әкеп соққан жағдайға қатысты. Ол бойынша екі жылға дейін бас бостандығын шектеу немесе бас бостандығынан айыру жазасы қарастырылған. Әйел 2026 жылғы 1 шілдедегі «ҚР жаңа Конституциясының қабылдануына байланысты рақымшылық жасау туралы» заң бойынша қылмыстық жауаптылықтан босатылды, ал қамауда болған уақыты жаза мерзіміне есептелді.
Оқиға 10 маусымға қараған түні болған. Іс материалдарына қарағанда, ерлі-зайыптылар таныстарының үйінде қонақта отырып ішімдік ішкен, араларындағы ұрыс төбелеске ұласқан. Күйеуі әйелін ұрып-соғып, орындықты қолына алған, ал әйел оны ас үй пышағымен жарақаттаған. 45 жастағы ер адам жедел жәрдем келгенше қаза тапты. Әйел ұсталып, үкім шыққанға дейін қамауда болды.
Адвокат Талғат Жанболатов қорғауындағы әйелдің жылдар бойы күйеуінен соққы көріп келгенін және өзін қорғағанын алға тартты. Сотта отбасының таныстары мен көршілері ерлі-зайыптылар арасында жанжал жиі болып тұрғанын айтты. Сондай-ақ ер адамның соңғы үш жылда отбасылық-тұрмыстық саладағы құқық бұзушылық үшін төрт рет жауапқа тартылып, екі рет қамауға алынғаны анықталды.
Ерлі-зайыптылардың кәмелетке толмаған төрт баласы бар, тергеу кезінде олар балалар үйіне орналастырылған. Адвокаттың сөзінше, бұл мәселе қамқоршылық органдарымен сот арқылы келісілгеннен кейін балалар анасына қайтарылады.
Бұл іс жазда белгілі болды: ол кезде Жетісу полициясы әйелдің ұсталғанын хабарлады, ал әлеуметтік желіде оны қолдаған үндеулер тарады. Көршілері күйеуінің жиі ішіп, жанжал шығаратынын жазған, бірақ полиция ол кезде бұл ақпаратты ресми түрде растамаған. Заң бойынша өзін-өзі қорғаудың шегі қайда екенін қажетті қорғаныс туралы материалымызда талдаған едік.
