«Барыстың» бас бапкері Михаил Кравец американдық қақпашы Хантер Шепардтың командадан кететінін растады. Ол бұл туралы 12 қарашада «Адмиралды» 4:2 есебімен жеңген ойыннан кейінгі баспасөз мәслихатында Sports.kz тілшісінің сұрағына жауап беріп айтты. Бұл шешім астаналық клуб сол күні «Трактордан» айырбас арқылы алған Дмитрий Николаевтың келуіне байланысты.
Николаевтың келуі Шепардқа қатысты шешім қабылданатынын білдіре ме деген сұраққа Кравец қысқа жауап берді: «Иә, үш қақпашы болуы мүмкін емес қой». Бапкер американдыққа үміт артқанын мойындады: «Өкінішке қарай, мен де Хантердің осында ойнап кетуін, әрі жақсы ойнап кетуін қатты қаладым, оған бірінші нөмір рөлі берілген еді. Бірақ, өкінішке қарай, ол өзіне берілген мүмкіндікке ілініп қала алмады».
Кравец жаңа қақпашы туралы жылы лебіз білдірді. «Мен Николаевты көптен бері білемін, оны „Сан-Хоседе“ ойнайтын Аскаровпен бірге „Варяги“ деген командада жаттықтырғанмын, ондай команда болған», — деді ол. Бапкердің айтуынша, кейін қақпашының «ілгерілеуі болды, ол СКА-да да, басқа командаларда да ойнады». «Ол бізге плей-оффқа шығуға көмектесетін өте жақсы қақпашы деп санаймын», — деп қосты Кравец.
Шепард үшін бұл — ҚХЛ-дағы алғашқы маусым, бірақ ол үмітті ақтамады: 13 ойында американдық соққылардың тек 87,5%-ын қайтарды, ал оның әріптесі Андрей Шутовта бұл көрсеткіш — 93,6%. Қақпашының кетуі туралы қауесет қазан айында-ақ тараған, бірақ ол кезде клубтың баспасөз қызметі оны жоққа шығарып: «Клуб қақпашымен келісімшартты бұзу туралы ешқандай келіссөз жүргізіп жатқан жоқ», — деп мәлімдеген. 12 қарашада күндіз «Спорт-Экспресс» «Барыстың» американдықпен бәрібір қоштасатынын хабарлады, ал кешке мұны бас бапкер растады. Шепардтың келісімшарты маусым соңына дейін жасалған, тараптардың оны қалай тоқтататыны нақтыланбады.
«Адмиралды» жеңгеннен кейін 25 ойында 27 ұпай жинаған «Барыс» Шығыс конференциясында бесінші орынға көтерілді. Кравец командасы келесі ойынын 15 қарашада үйде Магнитогорскінің «Металлургімен» өткізеді.
