Сәрсенбіден бейсенбіге, 12 қарашаға қараған түні Ормуз бұғазында жалпы көлемі 4 млн баррельден асатын мұнай тиеген екі супертанкер жарылыстан кейін тоқтап қалды. Бұл туралы Ислам революциясы сақшылары корпусының (ИРСК) әскери-теңіз күштері хабарлады. Олардың айтуынша, екі кеме де жанып жатыр.
ИРСК-ның ресми сайты Sepah News жариялаған мәлімдемеде танкерлердің оңтүстік бағытпен жүзгені айтылған. Бұғаздағы қозғалысты басқару орталығы бұл жолдың «рұқсат етілмеген әрі қауіпті» екенін бірнеше рет ескерткен. Мәлімдемеге сәйкес, кемелер «өте күшті жарылыстан кейін тоқтаған». ИРСК навигация жүйесін өшіріп, АҚШ әскерімен бірге оңтүстік бағытпен жүзетін кез келген кемені де осындай тағдыр күтіп тұрғанын ескертті. Иранның мемлекеттік БАҚ-ы танкерлер теңіз минасына соғылды деп жазды, ал AFP мәліметінше, сақшылардың өзі болған оқиғаны «апат» деп атаған.
ИРСК танкерлердің атауын, туын, иесін және экипаждары туралы деректі келтірмеді, зардап шеккендер туралы ақпарат жоқ. Тәуелсіз растау әзірге жоқ: Ұлыбританияның теңіз операциялары орталығы UKMTO бұл оқиға туралы хабарлаған жоқ. АҚШ әскерилері жақында бұғаздағы барлық мина залалсыздандырылғанын мәлімдеген.
Осындай жағдайда Вашингтонда Тегеранмен тікелей келіссөз жүргізу мәселесі талқыланып жатыр. The Wall Street Journal мәліметінше, АҚШ вице-президенті Джей Ди Вэнс Иранның Ұлттық қауіпсіздік жоғарғы кеңесінің хатшысы Мохсен Резаимен кездесуді қарастырып отыр. Вэнс қазан айында оған кездесу сұрап хат жолдаған, бірақ күні әлі белгіленген жоқ. Тегеран атынан келіссөз жүргізіп жүрген Иран парламентінің спикері Мохаммад Бағер Ғалибаф Al Jazeera арнасына Иран өзі қойған жеті шартқа АҚШ-тың ресми жауабын күтіп отырғанын айтты. Оның сөзінше, бұғаздағы тәртіп соғысқа дейінгі қалпына «ешқашан оралмайды». Ғалибафтың айтуынша, Ормуздағы кеме қатынасы дәлізі мен қозғалысты бөлу жүйесі жөнінде Оманмен келісім бар.
Бейсенбі күні Brent мұнайының бір баррелі шамамен 92 доллардан саудаланды, бұл сәрсенбідегі деңгейге жуық. Бағаны өндірістің артуы да тежеп отыр: ОПЕК+ соғысқа дейінгі өндіріс көлеміне жақындады.
11 қарашада Иран армиясы тағы бір танкердің минаға соғылғанын хабарлаған еді — бұл туралы біз жазғанбыз. Бейбіт уақытта бұғаз арқылы әлемдік мұнайдың бестен біріне жуығы тасымалданады. АҚШ пен Израиль Иранға соққы жасағаннан кейін, 28 ақпаннан бастап Тегеран кемелерді тек өзімен келісілген бағыттар бойынша өткізіп отыр, ал АҚШ Иран порттарын теңізден қоршауда ұстап тұр. Қазақстан мұнайы экспортқа негізінен Каспий құбыр консорциумы арқылы Қара теңізге жөнелтіледі және Ормуз арқылы өтпейді, алайда елдің экспорттық түсімі мен бюджет кірісі Brent бағасына байланысты.
