Индонезия вице-президенті Гибран Ракабуминг Рака 12 қарашада, бейсенбі күні ресми түрде отставкаға кетті. Ол өтінішін президент Прабово Субиантоға және елдің жоғарғы заң шығарушы органы — Халықтық консультативтік конгреске тапсырды, деп хабарлайды Al Jazeera конгресс төрағасына сілтеме жасап. Прабово журналистерге отставканы «ауыр көңілмен» қабылдағанын айтты.
Президенттің сөзінше, Гибран бұл қадамға «ұлы мақсат үшін, ұлттың, мемлекеттің және Индонезия халқының мүддесі үшін» барған. Прабово Гибранның білімді белгіленген тәртіппен алғанына сенетінін, тек шетелдегі білім беру жүйесі индонезиялық жүйеден өзгеше екенін қосты, деп жазады AFP. Гибранның өзі айыптауларды тағы да жоққа шығарды: «Егер мектепті бітірмесем, университетке түсе алмайтыным анық қой».
Отставка жаңа сайлауды талап етпейді. Прабовоның екі кандидатты ұсынуға 14 күні бар, одан кейін парламент екі ай ішінде олардың бірін жаңа вице-президент етіп сайлайды. Оған дейін бұл лауазым бос тұрады.
39 жастағы Гибран — бұрынғы президент Джоко Видодоның үлкен ұлы, ол бес жылдық мерзімнің екі жылын ғана атқарды. Қазан айында Жоғарғы сот оның Сингапурдағы оқуын индонезиялық орта біліммен теңестірген куәлікті жарамсыз деп таныды, ал бұл лауазым үшін мектеп аттестаты міндетті. 10 қарашада Гибран Прабовоға қызметінен кеткісі келетінін айтқан еді — бұл туралы біз жазғанбыз. Сәрсенбіде сегіз партиядан 120 депутат Өкілдер палатасының басшылығына импичмент рәсімін бастауы мүмкін өтініш тапсырды.
Отставка елдегі саяси шиеленіс кезеңіне тұспа-тұс келді. Соңғы апталарда мыңдаған адам экономикалық қиындыққа, сыбайлас жемқорлыққа және биліктің бірнеше айға созылған орман өрттерімен күресіне наразылық білдіріп, көшеге шықты. Өткен аптада ұлттық полицияның бұрынғы басшысы мен үш жоғары лауазымды офицер ұсталды: олар президенттің телефонын тыңдады деген күдікке ілікті. Индонезия — халқының саны бойынша әлемде төртінші орындағы ел және Оңтүстік-Шығыс Азиядағы ең ірі экономика.
