Халықаралық хоккей федерациясы (IIHF) Спорттық төрелік сотқа (CAS) жүгініп, Ресей құрамаларын халықаралық турнирлерге қайтару туралы шешімге шағым түсірді. Бұл туралы 13 қарашада, жұма күні, канадалық TSN арнасының журналисі Горд Миллер хабарлады. Оның дерегінше, Ресей хоккей федерациясының пайдасына шешім шығарған үш төрешінің екеуінің Ресеймен жария етілмеген іскерлік байланыстары болған. IIHF шағымы туралы The Athletic басылымы да жазды. Федерация сенбі күні таңертеңге дейін ресми мәлімдеме жасаған жоқ.
CAS шешімін 30 қазанда шығарып, IIHF-ті ресейлік командаларды 2026/27 маусымындағы бес турнирге жіберуге міндеттеді. Олардың біріншісі — 26 желтоқсан мен 5 қаңтар аралығында Канаданың Эдмонтон және Ред-Дир қалаларында өтетін жастар арасындағы әлем чемпионаты, ең бастысы — Германияда өтетін 2027 жылғы ересектер арасындағы әлем чемпионаты. Сот IIHF ресейліктерді шеттетуге себеп ретінде келтірген қауіпсіздік қатерлеріне жеткілікті дәлел ұсынбады деп есептеді.
CAS алқасын итальяндық заңгер Джулио Палермо басқарды, оның құрамында мысырлық Исмаил Селим мен британдық Марк Ховелл болды. Швейцариялық Inside Paradeplatz басылымы Палермоның қыркүйекте, тағайындалуынан бірнеше апта бұрын, Мәскеуде төрелік сот туралы конференцияда сөз сөйлегенін, ал Селимнің 2025 жылы Ресей астанасындағы іс-шараға қатысқанын анықтады. CAS бұған жауап ретінде Палермо Мәскеуге тағайындалғанға дейін барғанын және бұл істі қарайтынын біле алмағанын, ал тараптардың алқа құрамына қарсылық білдіруге құқығы болғанымен, оны пайдаланбағанын мәлімдеді.
Канаданың TSN арнасы IIHF шағымы туралы жаңалықты X әлеуметтік желісінде жариялады:
Ресейдің оралуы қазірдің өзінде дауға ұласты. Канада ресейлік хоккейшілер мен ресми тұлғаларды, тіпті визасы болса да, жастар арасындағы әлем чемпионатына жібермейтінін мәлімдеді. Норвегия, Дания, Швеция, Финляндия, Латвия және Чехия бұған дейін Ресей құрамасымен ойнаудан бас тартатынын айтқан.
IIHF Ресей мен Беларусь құрамаларын 2022 жылғы ақпанда, Украинадағы соғыс басталғаннан кейін шеттеткен. 2026 жылғы шілдеде федерация қауіпсіздікті алға тартып, тыйымды 2026/27 маусымына ұзартты, ал Ресей хоккей федерациясы бұл шешімді CAS-та даулады.
