Уэльс ханшайымы Кейт 16–18 қараша аралығында ханзада Уильяммен бірге Үндістанның Мумбай қаласына барады. Кенсингтон сарайының хабарлауынша, онда Earthshot экологиялық сыйлығының салтанатты рәсімі өтеді. Бұл — Кейт 2024 жылы қатерлі ісікке шалдыққанын хабарлағаннан бергі ерлі-зайыптылардың шетелге бірге жасайтын алғашқы сапары.
Сарайдың айтуынша, ханзада мен ханшайым Мумбайда инновацияға, тұрақты дамуға, жастар көшбасшылығына және Ұлыбритания мен Үндістан байланыстарына арналған бірқатар кездесуге қатысады. Уильям сыйлықтың форумында сөз сөйлеп, финалистермен кездеседі, ал Кейт оған бірнеше іс-шарада қосылады. Hello! журналының жазуынша, бағдарлама көше крикетінен басталып, Болливудтың жетекші кинокомпанияларының бірі Dharma Productions-қа барумен аяқталады. Басты оқиға — 17 қарашадағы марапаттау рәсімі: бес жеңімпаздың әрқайсысы планетаны қорғауға арналған шешімін дамыту үшін 1 млн фунт стерлинг алады.
Сарай биылғы рәсімді сыйлық тарихындағы ең ауқымды шара деп атап отыр: Мумбайға 5000-ға жуық қонақ — мемлекет басшылары, ғалымдар, кәсіпкерлер, жастар мен байырғы халықтардың өкілдері күтіледі, ал Үндістанда жобаға 24 штаттан 15 мың мектеп қосылған. Кештің жүргізушілері ретінде актер Рами Малек, Болливуд жұлдыздары Алия Бхатт пен Сонам Капур және крикет аңызы Сачин Тендулкар жарияланды.
Кейт үшін бұл — 2022 жылдан бергі алғашқы Earthshot рәсімі. Ол жылы сыйлық Бостонда табысталған, ал сол сапар осы уақытқа дейін ерлі-зайыптылардың шетелге бірге барған соңғы сапары болып келді. 2023 жылы ханшайым ұлы Джорджды емтихан кезінде қолдау үшін рәсімге бармады, ал ауруы туралы жарияланғаннан кейін Уильям сыйлыққа жалғыз барып жүрді. Кейт 2024 жылғы қыркүйекте химиотерапия курсын аяқтап, кейін біртіндеп жұмысына оралды. Earthshot сыйлығын ханзада Уильям 2021 жылы құрды: он жыл ішінде ол ең өзекті экологиялық мәселелердің шешімдерін тауып, қолдауы тиіс. Ерлі-зайыптылар Үндістанға 2016 жылы ресми сапармен барған: ол кезде олар Мумбай мен Делиде болып, Казиранга ұлттық саябағын аралап, Тәж-Махалды көрген.
