Меган Маркл мен ханзада Гарри Уэльс ханшайымы Кейт 11 желтоқсанда Вестминстер аббаттығында өткізетін Together at Christmas рождестволық кешіне шақыру алмаған. Бұл туралы Daily Mail газетінің жексенбілік нұсқасы Mail on Sunday жазды. Басылымның дерегінше, Сассекс жұбайлары шамамен 1600 қонақтың тізімінде жоқ, оларды кешке күтіп отырған жоқ.
Газеттің инсайдері Кейт Сассекстердің рождестволық қайырымдылық жоспарлары оның кешінен назар аударып әкетеді деп алаңдаған деп мәлімдейді. Оның сөзінше, Гарри мен Меган ханшайымның кеш күнін жариялауын әдейі күтіп, артынша өздерінің мерекелік шараларын айтпақ болған көрінеді. «Рождество — Кейттің ісі, ол олардың өз шегінде болғанын қалайды», — дейді газеттің дереккөзі.
Бұл ақпаратты ешкім ресми түрде растаған жоқ. Уэльс және Сассекс жұбайларының өкілдері пікір білдірмеді, ал кеш туралы хабарландыруда Гарри мен Меганның есімі аталмайды.
Кейт Together at Christmas кешін 2021 жылдан бері өткізіп келеді, биыл ол алтыншы рет өтеді. Кештің тақырыбы — «махаббат, мейірім және бір-біріне қамқорлық». Негізгі қонақтары — өзгелерге қолдау көрсетіп, ешкімнің жалғыз қалмауына көмектесетін адамдар. Әдетте кешке ханзада Уильям мен олардың үш баласы келеді, ал король Карл III пен королева Камилла көбіне қатыспайды. Кештің жазбасын Британияның ITV1 арнасы 24 желтоқсанда, Рождество қарсаңында көрсетеді.
Меган Маркл — «Форс-мажорлар» сериалымен танымал америкалық актриса, 2018 жылдан бері ханзада Гарридің жұбайы әрі Сассекс герцогинясы. 2020 жылы жұп корольдік міндеттерден бас тартып, АҚШ-қа көшіп кеткен еді. Британ БАҚ-ының дерегінше, тамызда олар Ұлыбританияға оралып, балалары Арчи және Лилибетпен бірге Котсуолдқа қоныстанды. Таблоидтардың жазуынша, Сассекстер Рождествоны сонда Меганның анасы Дория Рэглендпен бірге қарсы алады. Олар корольдік отбасымен Сандрингемде соңғы рет 2018 жылы мереке тойлаған. Бұған дейін Daily Mail Гарри мен Меганның Карл III-нің туған күніне де шақырылмағанын хабарлаған.
