15 қарашада, жексенбі күні, түнде және таңертең Бахрейнде сирена дауысы мен жарылыстар естілді. Иранның Ислам революциясы сақшыларының корпусы (ИРСК) өзінің алты дроны Эр-Рифа тікұшақ базасындағы АҚШ-тың әуе шабуылына қарсы қорғаныс радарына шабуыл жасағанын мәлімдеді. Бахрейн Ішкі істер министрлігі тұрғындарды бірнеше рет сабыр сақтап, ең жақын қауіпсіз жерге паналауға шақырды. AFP мәліметінше, алғашқы жарылыстар жергілікті уақытпен шамамен сағат 4:00-де (Астана уақытымен 6:00-де), екінші легі шамамен 6:30-да (Астана уақытымен 8:30-да) естілген.
Бахрейн Қорғаныс күштері X әлеуметтік желісінде әуе қорғанысы бірнеше ирандық әуе шабуылын нысанаға жеткенге дейін ұстап, жойғанын хабарлады. «Иран жүйелі түрде дұшпандық бағытын жалғастырып отыр», — делінген әскерилердің мәлімдемесінде. Қаза тапқандар, жараланғандар және қираған нысандар туралы хабарланған жоқ. Вашингтон шабуылға әзірге пікір білдірмеді.
Иранның мемлекеттік телеарнасы таратқан ИРСК мәлімдемесінде бұл соққы АҚШ-қа берілген «шешуші әрі талқандаушы жауаптың екінші кезеңі» деп аталды. Корпус сондай-ақ Ормуз бұғазы жабық күйінде қалатынын мәлімдеп, АҚШ-тың кез келген агрессиясына «бұдан да қатаң» жауап беретінін ескертті. Бұдан бөлек, ИРСК Ормуз бұғазындағы Кешм аралының үстінде америкалық MQ-1 дронын атып түсіргенін айтты. Корпустың сөзінше, бұғаздың оңтүстігінде тағы екі танкер сәйкестендіру жүйелерін өшіріп, «рұқсат етілмеген бағытпен» жүзіп бара жатқанда минаға соғылып, өртенген. Тегеран кемелердің атауын келтірмеді, теңіз билігі минаға соғылу дерегін растаған жоқ. Бұған дейін ИРСК төрт танкердің минаға соғылғанын хабарлаған.
Бұл — үш күн ішінде Бахрейнге жасалған екінші шабуыл. 13 қарашада, жұма күні, ИРСК АҚШ-тың ерте ескерту радарын жойғанын мәлімдеген. Сол кезде АҚШ Орталық қолбасшылығы (CENTCOM) Бахрейнге қарай ұшқан екі ирандық шабуылдаушы дронды атып түсіргенін айтып, радар туралы деректі жоққа шығарды.
Сол түні Сауд Арабиясының әуе қорғанысы йемендік хуситтер Эр-Риядқа қарай атқан екі баллистикалық зымыранды және Шығыс провинциядағы екі дронды ұстап қалды. Бұл туралы Эр-Рияд бастаған коалицияға сілтеме жасап, Сауд баспасөз агенттігі хабарлады.
Бахрейнде АҚШ Әскери-теңіз күштерінің 5-флотының штабы орналасқан. Соғыс 28 ақпанда АҚШ пен Израильдің Иранға соққы беруінен басталды. Сәуірде тараптар атысты тоқтатуға келісті, алайда маусымда өзара түсіністік туралы меморандумға қол қойылғанына қарамастан, келіссөздер тұйыққа тірелген соң ұрыс қайта басталды. Қазақстан үшін Ормуз бұғазы маңындағы шиеленіс ең алдымен мұнай бағасына әсер ететіндіктен маңызды, өйткені мұнай — елдің негізгі экспорттық тауары.
