Tesla Cybercab-ты компанияның жазбаша рұқсатынсыз сатқан немесе басқа біреуге берген иесінен кемінде 50 000 доллар (шамамен 22,2 млн теңге) тұрақсыздық айыбын талап етеді. Мәміле бұдан қымбат болса, айып оның сомасына тең болады. Бұл талаптар Tesla жеке пайдалануға арналған пилотсыз көліктің тапсырыс бетінде жариялаған келісімшарттарда жазылған, деп хабарлайды Teslarati. Сонымен қатар компания көлікті өзі белгілеген нарықтық бағамен кері сатып алу құқығын сақтап қалады, ал оны қайтаруға кететін шығынды иесі көтереді.
Рулі мен педалі жоқ Cybercab тек айына 299 доллар (шамамен 133 мың теңге) тұратын ақылы Autonomy жазылымымен ғана жүреді. «Сіздің Cybercab белсенді Autonomy жазылымынсыз жұмыс істемейді», — делінген Electrek басылымы талдаған келісімшартта. Tesla жазылым бағасын иесін бір ай бұрын ескертіп өзгерте алады. Жазылым қызмет көрсетудің бір бөлігін — шиналарды, алдыңғы әйнекті, сүзгілерді, камераларды тазалауды және шектеулі эвакуацияны өтейді. Сақтандыру, тіркеу, зарядтау, тұрақ және салонды тазалау иесінің мойнында.
Көлік тек Tesla робот-такси аймақтарында ғана жұмыс істейді, қазір олар Техас пен Флориданың бірнеше қаласында бар. Олардан тыс шығуға тыйым салынған әрі ол техникалық тұрғыдан бұғатталуы мүмкін, ал аймақтың өзін компания келісімшартқа сәйкес «кез келген уақытта кеңейтуі, қысқартуы, басқа жерге ауыстыруы немесе өзге де жолмен өзгертуі мүмкін». Tesla сондай-ақ көлікті қашықтан тауып, оның жұмысын шектеуге немесе «қауіпсіз күйге» ауыстыруға құқылы. Салондағы камераның суреттері әдепкі бойынша 30 күн сақталады.
Сатып алынған Cybercab робот-такси жүретін аймақтарда жүретінін Tesla-ның жасанды интеллект бөлімінің басшысы Ашок Эллусвами растады. «Ол @robotaxi-мен бірдей барлық геоаймақтың ішінде бақылаусыз жұмыс істейді, тек иелерінің қажетіне қызмет етеді», — деп жазды ол X желісінде.
Cybercab-ты тек жеке мақсатта пайдалануға болады. Компанияның жазбаша рұқсатынсыз Tesla робот-такси желісі немесе Uber арқылы жолаушы тасуға, жеткізу қызметінде жұмыс істеуге немесе көлікті жалға беруге болмайды. Пленканы, тонировканы және басқа дөңгелектерді тек Tesla немесе оның серіктестері арқылы орнатуға рұқсат етіледі. Көлікті пайдалану кезінде ереже үш және одан көп рет бұзылса, автономды жүргізу бір аптаға өшіріледі, бұл мерзім үшін ақша қайтарылмайды. Cybercab-ты экран арқылы қолмен тек қысқа қашықтыққа, сағатына 3 км-ге дейінгі жылдамдықпен жылжытуға болады, ол үшін жүргізуші куәлігі қажет.
Tesla 14 қарашаға қараған түні таңдаулы сатып алушыларға Cybercab-қа тапсырыс қабылдауды бастады. Көліктің бағасы — 29 990 доллар (шамамен 13,3 млн теңге), тапсырыс үшін 1000 доллар қайтарылмайтын депозит алынады, ал алғашқы көліктерді желтоқсанда Техас қалаларында табыстау уәде етілген. Илон Маск айына 299 доллар тұратын жазылымды тым қымбат деп атады: оның айтуынша, ол айына шамамен 115 доллар тұруы керек. Қайта сатқаны үшін 50 000 доллар айып туралы тармақты Tesla 2023 жылы Cybertruck келісімшартына да енгізген, бірақ кейін сынға ұшырағаннан соң алып тастаған.
