Tesla жүргізушісіз Cybercab көлігін жеке сатып алушыларға сата бастады, әзірге тек шақыру бойынша. Рөлі мен педальдары жоқ көліктің салықсыз бағасы – 29 990 доллар (шамамен 13,3 млн теңге). Бірақ ол айына 299 доллар (шамамен 133 мың теңге) тұратын міндетті Autonomy Subscription жазылымымен ғана жүреді. Тапсырыс қабылдау басталғанын Tesla Robotaxi ресми аккаунты 14 қарашада Астана уақытымен сағат 04:27-де X желісінде хабарлады.
Тапсырыс беру үшін 1000 доллар (шамамен 444 мың теңге) қайтарылмайтын депозит төлеу керек. Жазылымның алғашқы айы бағаға кіреді, ал бір жылдық жазылым 3588 доллар (шамамен 1,6 млн теңге) тұрады. Тапсырыс бетінде ұсақ әріппен «Жұмыс істеуі үшін жазылым және тұрақты техникалық қызмет көрсету қажет» деп жазылған. Tesla алғашқы көліктерді 2026 жылғы желтоқсанда Остинде табыстауға уәде етті.
Tesla Robotaxi жарияланымында сатып алушыларға арналған шақыру мен тапсырыс бетінің скриншоттары бар.
Cybercab тек Tesla робот-таксиі жұмыс істейтін аймақтарда ғана жүре алады. Шақыру хатында да «Тек қолдау көрсетілетін қызмет аймақтарында қолжетімді. Жұмыс істеуі үшін жазылым қажет» делінген. Қазір Tesla робот-таксиі сегіз қалада жұмыс істейді: Техастағы Остин, Даллас, Хьюстон, Форт-Уэрт пен Сан-Антонио, Флоридадағы Майами, Орландо және Тампа. Cybercab – 21 дюймдік сенсорлы экраны бар екі орындық электромобиль, жүксалғышының көлемі шамамен 570 литр. Бағытты көлік иесі Tesla қосымшасында белгілейді.
Tesla жазылым шарттарын толық жарияламады, олардың скриншоттарын X желісіндегі @scotsrule08 қолданушысы жариялады. Осы шарттарға сәйкес, Cybercab-ты тек жеке мақсатта пайдалануға болады: компанияның жазбаша рұқсатынсыз онымен Tesla Robotaxi немесе басқа такси сервистері арқылы жолаушы тасуға, жеткізу қызметінде қолдануға не жалға беруге болмайды. Рұқсат етілген аймақтан тыс жерде көлік жұмыс істемейді, ал аймақтың өзін Tesla кеңейтуі, қысқартуы немесе басқа жерге ауыстыруы мүмкін. Жазылымға автономды жүргізу, байланыс, қашықтан қолдау, жолдағы көмек, шиналарды, алдыңғы әйнекті, тазалағыштар мен салон сүзгілерін ауыстыру кіреді. Сақтандыруды, тіркеуді, зарядтау мен тұраққа қою ақысын иесі өзі төлейді. Экран арқылы көлікті қолмен тек қысқа қашықтыққа, сағатына 3 км-ге дейінгі жылдамдықпен жылжытуға болады, бұл мүмкіндік жалпы пайдаланудағы жолдарға арналмаған.
Робот-таксидің нақты жұмыс аймақтары жарияланғаннан кішірек. Robotaxi қосымшасында мыңдаған мекенжайды тексерген тәуелсіз зерттеуші Коби Пирстің есебінше, алты қалада көліктер Tesla көрсететін аумақтың 59–78 пайызында ғана тапсырыс қабылдайды. Алғашқы Cybercab жеткізілетін Остинде бұл көрсеткіш шамамен 59 пайыз.
Реттеушімен байланысты мәселе де әлі шешілген жоқ. Қыркүйекте NHTSA Tesla-дан тежегіш педалі жоқ көліктің федералдық қауіпсіздік стандарттарына сай екенін ант беріп дәлелдеуді талап етті, ал бұл стандарттарда мұндай педаль міндетті. Tesla 30 қазанда жауап беріп, оны толығымен құпия сақтауды сұрады. NHTSA әлі шешім шығарған жоқ.
Илон Маск 2024 жылғы қазанда Cybercab-ты таныстырғанда оның «30 000 доллардан арзан» болатынын айтқан. Tesla Остинде Cybercab-пен ақылы сапарларды 2026 жылғы 3 қыркүйекте бастады, ал үшінші тоқсан қорытындысына арналған қоңырауда басшылық көліктердің басым бөлігін компания робот-такси сервисі үшін өзінде қалдыратынын айтты. Cybercab шығару үшін Tesla Техастағы зауытында Cybertruck өндірісін біртіндеп тоқтатып жатыр, ал робот-такси желісі кеңейіп келеді: жақында сервис Сан-Антонио қаласында іске қосылды.
