15 қарашадан бастап Ақтөбе – Қандыағаш тас жолымен жүргені үшін барлық жүргізуші, оның ішінде жеңіл көлік иелері де ақы төлейді. «ҚазАвтоЖол» хабарлауынша, жеңіл көлікпен ақылы бөлік арқылы бір бағытқа жүру теңгерімді алдын ала толтырса шамамен 240 теңге, сапардан кейін төлесе 276 теңге тұрады. Алдын ала төлеммен барып-қайту шамамен 480 теңгеге шығады.
Ақылы болған – 11–100 шақырым аралығындағы 89 шақырымдық учаске. Ол жұмыс істеп тұрған Қандыағаш – Мақат ақылы тас жолына қосылды, енді оның ұзындығы 469,5 шақырымға жетті. Жеңіл көліктер тек 11–87 шақырым аралығындағы, шамамен 76 шақырымдық бөлікте ақы төлейді. Тас жолдың қалған бөлігінде, соның ішінде Қандыағаш – Мақат бағытында, жеңіл көліктер бұрынғыдай тегін жүреді, ал ақы тек автобустар мен жүк көліктерінен алынады.
Учаскеде көлік нөмірлерін 10 бақылау аркасы тіркейді, ақы автоматты түрде есептеледі. Көліктің теңгерімін kaztoll.kz сайтында, банк қосымшаларында және басқа да ресми төлем сервистерінде толтыруға болады. Ұлттық компания сапар алдында теңгерімді тексеріп, ақыны алдын ала төлеуге кеңес береді – бұлай арзанырақ. Республикалық тас жолдардың жай-күйі туралы ақпаратты тәулік бойы 1403 нөмірі арқылы білуге болады.
Ақылы учаскеге жақын ауылдар мен аудандарда тіркелген көліктерге жеңілдетілген абонементтер қарастырылған. Жеңіл көлікке арналған жылдық абонемент 1 АЕК, яғни 4325 теңге тұрады. Автобустар мен жүк көліктеріне санатына қарай 1-ден 5 АЕК-ке дейінгі (4325–21 625 теңге) айлық және 12-ден 60 АЕК-ке дейінгі (51 900–259 500 теңге) жылдық абонементтер бар.
«ҚазАвтоЖол» мәліметінше, ақылы жолдан түскен қаражат тас жолдарды күтіп ұстауға, жөндеуге және арнайы техника сатып алуға жұмсалады. Төрт жолақты Ақтөбе – Қандыағаш жолы реконструкциядан кейін 2025 жылы пайдалануға берілген, ал оны жеңіл көліктер үшін ақылы ету туралы шешімді Көлік министрлігі қараша айының басында хабарлаған. Қазақстанда ақылы тас жолдарды пайдаланушылар көбейіп келеді: тек жаз айларында ғана олармен 25,8 млн рет жүріп өткен.
