Кайли Дженнерге қарсы оның бұрынғы үй қызметкерлері жаңа талап арыздар беруі мүмкін. Бұл туралы 14 қарашада Page Six аты аталмаған дереккөзге сілтеме жасап хабарлады. «Бұл соңы емес», — деді ол басылымға. Page Six дереккөзінің айтуынша, талап арыздар әлі де болады, әрі «олардағы талаптар мәні жағынан қазіргілеріне ұқсас».
Қазір Кайлиге, оның компанияларына және бірнеше қызметкеріне қарсы бұрынғы персоналдан төрт талап арыз түскен, бәрі соңғы жеті айда берілген. Соңғысын 5 қарашада Лос-Анджелестің Жоғарғы сотына үй қызметшісі Динора Каролина Кабриа Амайя берді. Оның айтуынша, оны киім бөлмесіне қамап қойған, ал бір үйдің аумағында ит күркесін тазалап жүргенде оны ит қапқан. Амайя аптасына алты күн сағатына 40 доллардан (шамамен 17,8 мың теңге) жұмыс істегенімен, оған қосымша сағаттар мен Кайлидің үйлерінің арасындағы жол ақысы төленбегенін айтады. 2025 жылғы қыркүйекте ол жұмыс кезінде жарақат алған, ал 2026 жылғы ақпанда жұмыстан шығарылған. Амайя жауапкерлерді мүгедектігіне байланысты кемсітті, кек алды және заңсыз жұмыстан шығарды деп айыптайды.
Алғашқы талап арыздар көктемде түскен. Сәуірде Кайлиді бұрынғы екі үй қызметшісі — Анхелика Эрнандес Васкес пен Хуана Дельгадо Сото сотқа берді, олар қудалау, кемсіту және кек алу туралы мәлімдеген. Маусымда Jane Doe бүркеншік атымен бұрынғы жеке аспазшы талап арыз берді. Ол жүкті болғаны үшін кемсітуге ұшырағанын және ауыр жұмыстың салдарынан баласынан айырылғанын айтады. Бұрынғы қызметкерлердің мүддесін адвокат Делла Шейкер қорғайды. «Біз абыройды емес, құқықты қорғау үшін келдік. Және біз шегінбейміз», — деді ол.
Кайли тарапы айыптауларды жоққа шығарады. Оның адвокаты Майкл Роудс 10 қарашада Page Six басылымына барлық талап арызды бір заңгер беріп отырғанын айтқан. «Бұл заңгердің жариялылықты пайдаланып, негізсіз төлем алғысы келетіні анық», — деді ол. Роудс Кайлидің командасы қысымға көнбейтінін және «осы негізсіз талап арыздар бойынша белсенді түрде қорғанатынын» айтты. Сотта Кайлидің заңгерлері бұрынғы аспазшының бүркеншік атпен шығу құқығына да дау айтып отыр.
Кайли Дженнер 29 жаста. Ол — Кардашьян-Дженнер әпкелі-сіңлілердің ең кішісі, «Кардашьяндар отбасы» және The Kardashians реалити-шоуларының жұлдызы, Kylie Cosmetics косметикалық брендінің негізін қалаушы әрі Instagram-дағы ең танымал тұлғалардың бірі.
