Шығыс Қазақстан облысында қоңыр аюлар едәуір көбейді. 2026 жылғы қысқы маршруттық есептің қорытындысы бойынша өңірде 3787 аю мекендейді, ал 2022 жылы олардың саны 2977 болған, яғни 810-ға аз. Бұл деректерді облыстық орман шаруашылығы және жануарлар дүниесі аумақтық инспекциясы келтірді.
Аю саны жыл сайын бірдей өспесе де, жалпы алғанда артып келеді: 2023 жылы 3260, 2024 жылы 3113, 2025 жылы 3296 аю саналған. Қазіргі деректер әзірге алдын ала есеп болып саналады. Өңірдегі аюлардың нақты саны күзгі есептен кейін белгілі болады.
Аю көбейген сайын адамдармен кездесу де жиілей түсті. 2025 жылы инспекцияға елді мекендердің маңына аю шыққаны туралы 39 өтініш түссе, 2026 жылы олардың саны 47-ге жетті. Аюды көбіне Риддер мен Алтай ауданында көреді. Риддерде мұндай өтініш былтыр 23 болса, биыл 22 болды, ал Алтай ауданында екі есеге жуық артып, 11-ден 20-ға жетті. Жыл басынан бері облыстық табиғи ресурстар басқармасына қарасты орман және аңшылық шаруашылығы жедел ден қою жасағына жабайы жануарлардың, оның ішінде аюдың көрінгені туралы 78 хабарлама түсті.
Аюмен кездесу өңірде қауіпті жағдайға да ұласқан. 29 шілдеде Риддер маңындағы омарта жанында, Батыс Алтай мемлекеттік табиғи қорығынан алыс емес жерде, шамамен екі жастағы аю 58 жастағы риддерлік тұрғынға шабуыл жасады. Ер адамды қасындағы екі жолдасы аюдан арашалап қалды. Ол бірнеше күн жансақтау бөлімінде жатып, тамызда үйіне шығарылды. Жедел ден қою жасағының мәліметінше, аю сол кезде жойылды. Жасақ мамандары былтыр аналық аюлар көп төлдегенін, әрқайсысының екі-үш қонжығы болғанын да айтқан еді.
