Ислам революциясы сақшылары корпусы (ИРСК) 15 қарашада, жексенбі күні, Парсы шығанағында 2 млн баррельден астам мұнай тиелген супертанкер суға батқанын мәлімдеді. Иран әскерилерінің айтуынша, бұл кеме және тағы бір танкер Ормуз бұғазы арқылы Тегеран рұқсат бермеген оңтүстік бағытпен өтіп бара жатқанда теңіз миналарына соғылып жарылған. ИРСК кемелердің атауын, туын және экипаждары туралы деректі жария етпеді, тәуелсіз растау әзірге жоқ.
«Соңғы бірнеше сағатта Ормуз бұғазының оңтүстік бөлігінде рұқсат етілмеген бағытпен жүзіп келе жатқан екі мұнай танкері теңіз миналарына соғылып, қатты жарылыс пен өрт болды. Осы кемелердің бірі — 2 миллион баррельден астам шикі мұнай тасыған супертанкер Парсы шығанағының оңтүстік суларында суға батты», — делінген ИРСК мәлімдемесінде. Мәлімдемені Иранның мемлекеттік телеарнасы таратты. Корпус кемелер сәйкестендіру жүйелерін сөндіріп, америкалық әскерилердің қолдауымен жасырын өтпек болған деп отыр. Осы аудандағы балықшыларға суға батқан кеменің қаңқасынан сақ болу ұсынылды.
Ұлыбританияның Теңіз сауда операциялары орталығы (UKMTO) Үндістанның теңіз билігінен шығанақта Ормузға қарай шығысқа бет алған танкерге шабуыл жасалғаны туралы хабар алғанын айтты. Бұл Иран айтып отырған оқиға ма, жоқ па — белгісіз. UKMTO деректеріне қарағанда, экипаж аман, ал келтірілген залал мен табиғатқа тиген зиянның көлемі әзірге белгісіз. АҚШ бұған дейін бұғаздағы негізгі бағыттарды минадан тазартқанын мәлімдеген еді.
Ормуз бұғазы арқылы әдетте әлемдік мұнайдың шамамен бестен бірі өтеді. 28 ақпанда АҚШ пен Израиль Иранмен соғыс бастағаннан кейін Тегеран кеме қатынасын қатты шектеп, кемелердің тек өзі рұқсат еткен бағытпен жүруін талап етіп отыр, ал АҚШ бұған жауап ретінде Иран порттарын теңізден қоршауға алды. Халықаралық теңіз ұйымының деректері бойынша, 11 қарашаға дейін Ормуз бұғазы мен оның маңында кемелерге қатысты 134 оқиға расталып, 25 теңізші қаза тапқан. Осы аптада ИРСК төрт танкердің жарылғанын мәлімдеген еді, ал жексенбі күні Бахрейнге дрондармен шабуыл жасағанын хабарлады.
Қазақстан үшін бұғаздағы жағдай баға арқылы маңызды: Қазақстан мұнайы негізінен ҚҚК арқылы, Таяу Шығысқа соқпай экспортталады, бірақ оның құны Brent маркасына байланған. Gulf News хабарлауынша, соңғы екі аптада Brent фьючерстері 18,5%-ға арзандады.
