Қытайдың Bilibili Gaming (BLG) командасы League of Legends бойынша әлем чемпионы атанды. Бұл – әлемдегі ең танымал компьютер ойындарының бірі: онда бес адамнан тұратын екі команда қарсыластың базасын қиратуға тырысады. Нью-Йорктағы Barclays Center аренасында 14 қарашада өткен Worlds 2026 турнирінің финалында BLG оңтүстіккореялық Gen.G командасын 3:1 есебімен ұтты. Қытай командасы жылдың басты турнирін 2021 жылдан бері алғаш рет жеңіп, корей клубтарының төрт жылдық жеңіс сериясын үзді.
Финал Gen.G-нің жеңісімен басталды: алғашқы ойынды корейлер 38 минутта ұтып алды. BLG екінші ойында есепті теңестірді. Бұл бүкіл чемпионаттағы ең ұзақ ойын болды – ол 53 минутқа созылды. Үшінші ойынды қытай командасы 37 минутта жеңді, ал төртіншісінде 42 минутта сериядағы жеңісін бекітті.
Чемпиондық атақ үшін Bilibili Gaming 1 млн доллар алды. Бұл Ұлттық банк бағамы бойынша шамамен 444,3 млн теңге. Екінші орын алған Gen.G 800 мың доллар, яғни шамамен 355,4 млн теңге тапты. Worlds 2026 турнирінің жалпы жүлде қоры 5 млн долларды, шамамен 2,2 млрд теңгені құрады.
BLG-нің кубокқа жеткен жолы турнир тарихындағы ең қиын жолдардың бірі болды. Команда топтық кезеңді еуропалық Movistar KOI-ден жеңілумен бастады, кейін отандастары Top Esports-қа есе жіберді де, плей-оффқа соңғы шешуші матч арқылы ғана шықты. GosuGamers хабарлауынша, чемпиондыққа жету жолында қытайлар корейдің төрт командасын да шығарып тастады: Hanwha Life Esports, Dplus KIA, әлемнің қазіргі чемпионы T1 және финалда Gen.G.
BLG ойыншылары Чэнь Цзэбинь (bin), Пэн Лисюнь (Xun), Чжо Дин (Knight) және Ло Вэньцзюнь (ON) үшін бұл – әлем чемпионы атағын алғаш рет жеңіп алуы. Кореялық Пак До Хён (Viper) бұл атақты екінші рет алды – ол алғаш рет 2021 жылы қытайлық EDward Gaming құрамында чемпион болған. Орталық ойыншы Knight екі жыл бұрын да финалға шыққан, бірақ ол кезде BLG T1-ге жеңілген еді.
Bilibili Gaming бұл маусымды өте сәтті өткізді: наурызда команда First Stand халықаралық турнирін жеңді, ал жазда Mid-Season Invitational финалына шығып, Hanwha Life Esports-қа есе жіберді. Gen.G үшін Нью-Йорктағы финал әлем чемпионаттарына сегіз рет қатысқандағы ең үздік нәтижесі болды. League of Legends ойынын 2009 жылы америкалық Riot Games компаниясы шығарған, ойын тегін таратылады. Riot Games деректері бойынша, келесі әлем чемпионаты 2027 жылы Оңтүстік Кореяда өтеді.
