Испания құрамасы Ұлттар лигасының 5-турында Прагада Чехияны 2:0 есебімен ұтып, қатарынан 12-жеңісіне жетті. Алекс Баэна пенальтиден, ал Марк Пубиль қосылған уақытта гол соқты, деп жазады испаниялық The Objective басылымы.
Есеп 39-минутта ашылды. VAR арқылы қайта қарағаннан кейін черногориялық төреші Никола Дабанович Лукаш Амброс допты шынтағымен ойнағаны үшін пенальти тағайындады. Баэна қатты соқты, қақпашы Матей Коварж допқа тек тиіп үлгерді. Екінші таймның басында Йереми Пино Унаи Симонның алыс пасынан кейін гол соқты, бірақ бейнеқайталау офсайдты анықтады. Шамамен 70-минутта чехтер онға қарсы қалды: соңғы қорғаушы болған Ладислав Крейчи Роберто Фернандеске қарсы ереже бұзып, қызыл қағаз алды. Үй иелерінің де гол соғуға мүмкіндігі болды: Адам Гложек басымен соққан доп көлденең ағашқа тиді, ал Лукаш Проводтың соққысы бағанның жанынан өтті. Матчтың соңғы шабуылында ауыстырудан шыққан Пубиль төменнен соғып, түпкілікті есепті белгіледі.
Испания мүмкін 15 ұпайдың бәрін жинап, A3 тобында бірінші орында тұр. Луис де ла Фуэнтенің командасы негізгі уақытта қатарынан 43 ойында жеңілген жоқ. Чехия бес турда бес рет жеңіліп, әлі бір ұпай да ала алмады.
Соңғы турда, 16 қарашаға қараған түні Астана уақытымен сағат 00:45-те, Испания Мадридтегі «Метрополитано» стадионында Англияны қабылдайды. Англия сол кеші Хорватияны 2:1 есебімен ұтып, ширек финалға шықты, ал Испанияға топта бірінші орынды алу үшін тең ойын да жеткілікті. Чехия осы уақытта Хорватияда қонақта ойнайды.
