«Манчестер Юнайтед» ойыншылары жұмыстан босатылған Майкл Каррикпен қоштасты. Мұны алғаш болып қорғаушы Гарри Магуайр жасады: ол Instagram-дағы сторисінде «Әрдайым аңыз болып қалады. Құрмет. Рақмет» деп жазды. Одан кейін бапкерге жартылай қорғаушы Кобби Мейну («Бәрі үшін рақмет, босс») мен қорғаушы Патрик Доргу («Рақмет, бапкер, болашақта сәттілік») алғыс айтты. Жас ойыншылар да Каррикпен қоштасты: Тайлер Флетчер «Бәрі үшін рақмет» деп жазса, Ши Лейси «Бәрі үшін рақмет, босс. Болашақта барлық жақсылықты тілеймін» деді.
«Юнайтедтің» бұрынғы қорғаушысы, Sky Sports сарапшысы Гари Невилл бапкерді ауыстыру клубтың проблемаларын шешпейді деп санайды. «Бапкерді ауыстыра беріп, мәселенің шешімі осы деп ойлай беруге болады. Бірақ 12 жыл ішінде бұл шешім емес екені дәлелденді», — деді ол NBC эфирінде, оның сөзін Sky Sports келтіреді. Невиллдің айтуынша, клубта әлемдік деңгейдегі бапкерлер де, жас мамандар да, бұрынғы ойыншылар да нәтиже бермеген: «Ешқайсысы нәтиже бермеді, өйткені физикалық дайындық бөлімі нашар, іріктеу бөлімі нашар болса және клубтың өне бойында мықты басшылық болмаса, сәтсіздікке ұшырайсың».
«Юнайтед» Каррикпен қоштасқанын 12 қарашада, бейсенбіде жариялады. Ол командаға қаңтарда Рубен Аморим жұмыстан босатылғаннан кейін келіп, 17 ойынның 12-сінде жеңіске жетті және Чемпиондар лигасына жолдама алып берді, ал мамырда 2028 жылға дейін келісімшарт жасады. Жаңа маусымда команданың 15 ойында үш жеңісі бар, Премьер-лигада 10 турдан кейін 18-орында тұр. Каррикті Маурисио Почеттино алмастырады: Sky Sports дерегінше, тараптар 2029 жылға дейінгі келісімшарт жөнінде уағдаласты. Бұған дейін клуб иелерін MUST жанкүйерлер бірлестігі де сынаған.
