«Манчестер Юнайтедтің» капитаны Бруну Фернандеш клубтың жаңа келісімшарт туралы екінші ұсынысынан да бас тартты. Бұл туралы 12 қарашада, бейсенбіде The Athletic журналистері Лори Уитвелл мен Адам Крафтон хабарлады.
«»Юнайтедтің» капитаны Фернандешпен жаңа келісімшарт туралы келіссөздер жаздан бері жүріп жатыр, сол кезде алғашқы ұсыныс жасалып, португал оны қабылдамаған. Жақында «Юнайтед» жақсартылған шарттар ұсынды, бірақ Фернандештің әзірге көңілі толмай отыр, сондықтан келіссөздер әрі қарай жалғасады деп күтілуде», — деп жазады басылым. The Athletic дерегінше, жалақы мен жаңа келісімшарттың мерзімі әлі талқыланып жатыр.
32 жастағы жартылай қорғаушының қазіргі келісімшарты 2027 жылғы маусымға дейін жарамды, алайда клубтың оны тағы бір жылға ұзарту құқығы бар. Ресми түрде Фернандеш қаңтардан бастап шетелдік клубтармен келіссөз жүргізе алар еді, бірақ «Юнайтед» бұл құқықты пайдаланса, мұндай мүмкіндік жойылады. The Athletic жазуынша, клуб капитанның командада қалғанын қалайды.
Бұл жаңалық «Юнайтед» Майкл Каррикті жұмыстан босатқан күні шықты. Оның орнына Маурисио Почеттино келуі тиіс: Sky Sports дерегінше, тараптар 2029 жылға дейінгі келісімшарт жөнінде уағдаласты. Өткен маусымда Фернандеш командаға Премьер-лигада үшінші орын алып, Чемпиондар лигасына оралуға көмектесті, ал 2025 жылдың жазында «Әл-Хилалға» ауысудан бас тартқан. Қазір «Юнайтед» 10 турдан кейін 18-орында тұр.
