Алтын 12 қарашада шамамен 3%-ға арзандап, бір трой унциясы (шамамен 31,1 грамм) 3 864 долларға дейін түсті – бұл 2025 жылғы қазаннан бергі ең төмен деңгей. USAGOLD хабарлауынша, спот баға, яғни дереу жеткізуге арналған баға, АҚШ-тағы сауда аяқталар кезде, Астана уақытымен 13 қарашаға қараған түні шамамен 3 866 доллар деңгейінде тұрды. Желтоқсандық фьючерстер – алтынды желтоқсанда жеткізуге арналған келісімшарттар 3,2%-ға арзандап, 3 872 долларға түсті.
Сатылым үшінші күн қатарынан жалғасып келеді. Yahoo Finance дерегінше, 12 қарашада сауда ашылғанда алтын бір апта бұрынғыдан 2%-ға, бір ай бұрынғыдан 5,4%-ға, ал бір жыл бұрынғыдан 3,3%-ға арзан болды. Әлемдік нарықта бір грамм алтын енді шамамен 124 доллар, яғни шамамен 55 мың теңге тұрады.
Алтынмен бірге басқа бағалы металдар да арзандады. Күміс бір унциясы үшін 50 доллардан төмен түсті.
| Металл | 12 қарашадағы баға, унциясы үшін доллар | Бір күндегі өзгеріс |
|---|---|---|
| Алтын | 3 866 | −3,0% |
| Күміс | 49,97 | −3,3% |
| Палладий | 997,19 | −3,0% |
| Платина | 1 519,05 | −1,2% |
Басты себеп – ФРЖ мөлшерлемесі. АҚШ-та қазандағы бағалар болжамнан жоғары өскеннен кейін нарық Федералдық резервтік жүйе 8–9 желтоқсандағы отырыста мөлшерлемені 0,25 пайыздық тармаққа көтеретініне сенімді: CME FedWatch дерегінше, бұның ықтималдығы – 90,8%. Мөлшерлеменің бірден 0,5 п.т.-ға көтерілу мүмкіндігі де артып келеді. Алтын пайыз әкелмейді, сондықтан мөлшерлеме неғұрлым жоғары болса, оны ұстау соғұрлым тиімсіз. Оның үстіне доллар соңғы 19 айдағы ең жоғары деңгейге жуықтады. TD Securities АҚШ мемлекеттік облигацияларының кірістілігі өсуін, алтынды сақтау шығынының артуын және доллардың нығаюын «алтын үшін елеулі кедергілер» деп атады.
Бағаның төмендеуіне мұнай да әсер етті. АҚШ президенті Дональд Трамп 12 қарашада Truth Social желісінде: «Бізге Иранмен келісім керек емес. Ол күндер әлдеқашан өтті», – деп жазды. Осыдан кейін мұнай 1%-дан астам қымбаттады. Нарық сарапшысы Джим Уайкоффтың айтуынша, қымбат мұнай инфляцияға қатысты алаңдаушылықты және ФРЖ мөлшерлемені ұзақ уақыт жоғары деңгейде ұстайды деген күтуді күшейтеді.
Банктер болжамдарын қайта қарап жатыр. Citi алдағы үш айдағы алтын бағасына қатысты болжамын унциясы үшін 4 800 доллардан 4 500 долларға дейін төмендетіп, 6–12 айға арналған болжамын 5 000 доллар деңгейінде қалдырды. Банктің бір сценарийі бойынша, егер Ормуз бұғазына төнген қауіп сейілмесе, ал ФРЖ мөлшерлемені көтеруін жалғастырса, алтын 3 500 долларға дейін түсуі мүмкін – Citi мұндай нәтиженің ықтималдығын 30% деп бағалайды. Нарық үшін келесі бағдар – жұма күні, 13 қарашада жарияланатын АҚШ-тағы өндірушілер бағасы туралы деректер.
