АҚШ-та тұтыну бағалары қазан айында бір айда 0,4%-ға өсті. Бұл туралы 10 қарашада АҚШ Еңбек министрлігінің Еңбек статистикасы бюросы хабарлады. Экономистер 0,3% өсім күткен еді. Азық-түлік пен энергияны есептемегенде, базалық бағалар 0,3%-ға қымбаттады – тамыз бен қыркүйектегідей.
Бұл деректерден кейін нарық Федералдық резерв жүйесі (ФРЖ) 8–9 желтоқсандағы отырысында мөлшерлемені көтеретініне сенімді. Бұл – шешім алдындағы инфляция туралы соңғы есеп. ФРЖ қыркүйекте мөлшерлемені 2023 жылдан бері алғаш рет 4%-ға дейін көтеріп, қазанның соңында үзіліс жасады. Yahoo Finance жазуынша, трейдерлер мөлшерлеменің бірден 0,5 пайыздық тармаққа көтерілу ықтималдығын шамамен 15% деп бағалап отыр. АҚШ қор индекстері сейсенбіде төмендеп жабылды.
Ең көп қымбаттағаны – азық-түлік: бір айда 0,5%-ға, негізінен ет пен сүт өнімдері, ал латук салаты бірден 7,3%-ға қымбаттады. Энергия тасымалдағыштар қыркүйектегі 5,2%-дық секірістен кейін 0,7%-ға, бензин 1%-ға өсті. Тұрғын үй шығыны 0,3%-ға артты.
Бюро қазандағы жылдық инфляцияны жарияламады: 2025 жылғы қазанда үкімет жұмысы тоқтап қалғандықтан, деректер жиналмаған, сондықтан салыстыратын көрсеткіш жоқ. Қыркүйекте бағалар бір жылда 3,7%-ға өскен. Жылдық деректері бар бензин бір жылда 37,4%-ға қымбаттаған.
Kiplinger жазуынша, сарапшылар бұл есептен кейін АҚШ облигацияларының кірістілігі өсіп, доллар нығаяды деп күтеді. Қазақстан үшін доллар бағамы тікелей маңызды: 11 қарашаға белгіленген ресми бағам – 447,52 теңге.
АҚШ-та бағалар көктемде, Иранмен соғыс бензин құнын көтерген кезде күрт өсті. Жазда инфляция баяулағанымен, тамыз бен қыркүйекте қайта үдеді. «Біздің міндетіміз – инфляцияны төмендету», – деген еді ФРЖ басшысы Кевин Уорш 28 қазанда.
