Англияда АҚШ армиясының 41 жастағы әскери қызметшісі Ресей барлауына жұмыс істеді деген күдікпен ұсталды. Британияның терроризмге қарсы полициясының хабарлауынша, ол 10 қарашада елдің батысындағы Глостер маңында қолға түсті. Оған 2023 жылғы Ұлттық қауіпсіздік туралы заңның 1 және 3-баптары бойынша күдік келтірілген: бұл баптар құпия мәліметтерді алу немесе беру және шетелдік барлауға көмектесу туралы. Полиция дерегінше, іс Ресейге қатысты.
Ұсталған адам Лондондағы полиция бөлімшелерінің бірінде отыр, оған әлі айып тағылған жоқ. Глостершир графтығындағы екі жерде тінту жүргізілді. Әскеридің аты-жөні мен әскери атағы аталмайды. BBC дерегінше, ол Иннсворттағы Имджин лагерінде қызмет еткен – онда НАТО-ның Жедел әрекет ету корпусының штабы орналасқан. Британ заңы бойынша күдіктіні айып таққанға дейін 14 күнге дейін ұстауға болады.
Іспен Ұлыбритания мен АҚШ ведомстволары бірлесіп айналысып жатыр. «Бұл маңызды тұтқындау – Ұлыбритания мен АҚШ билігінің тығыз бірлескен жұмысының нәтижесі», – деді терроризмге қарсы полицияның үйлестірушісі Вики Эванс. ФБР директоры Кэш Патель бюро АҚШ-қа берген антын бұзғандарға төзбейтінін айтып, соңғы 21 айда тыңшылық пен қарсы барлау істері бойынша 167 адам ұсталғанын хабарлады – бұл 53%-дық өсім. АҚШ армиясының қарсы барлау қолбасшылығының басшысы бригада генералы Шон Стинчон бұл оқиға іштен төнетін қауіптің «шынайы әрі әлі де сақталып отырғанын» еске салатынын айтты.
Тұтқындау АҚШ Ұлыбританиядағы Милденхолл базасынан жанармай құятын ұшақтарын әкеткеннен кейін бір күннен соң болды. The Wall Street Journal дерегінше, оған Иран тарапынан төнген қауіп себеп болған. Қыркүйекте американдықтар осындай себеппен Фэрфорд базасынан B-1 бомбалаушы ұшақтарын әкеткен. Полиция жаңа істің өзінің басқа тергеулерімен байланысы жоқ екенін атап өтті.
Батыс шенеуніктері Ресей 2022 жылғы ақпанда Украинаға толық ауқымды басып кіргеннен кейін Еуропада болған 200-ге жуық диверсия мен өзге де дұшпандық әрекетті Мәскеумен байланыстырады: өрт қою, дрон ұшыру, кибершабуыл, әскери технологияларды ұрлау.
