Украина мен Ресей Біріккен Араб Әмірліктерінің астанасы Әбу-Дабидегі келіссөздерде тұтқындарды ауқымды түрде алмасуды талқылады: мыңға мың адам, тіпті бір жарым мыңға бір жарым мың. Бұл туралы 10 қарашада кешке Украина президенті Владимир Зеленский журналистерге айтты. «Бүгін алмасу мүмкіндігін талқыладық. Мыңға мың, бәлкім, бір жарымға бір жарым мың жасағысы келеді. Әйтеуір ірі алмасу болмақ. Осы күн тәртібімен американдықтар Ресейге барады», — деді ол.
Бұл — Украина, АҚШ және Ресейдің үшжақты кездесуінің алғашқы күнінен кейін аталған алғашқы сандар. Бұған дейін тараптар ауқымды алмасуға келіскенін ғана хабарлап, адам санын да, мерзімін де ашпаған еді. Алмасу қашан өтетінін және тізімге кімдер енетінін Зеленский нақтыламады.
Президенттің сөзінше, Ресей тарапы келіссөзде аумақ мәселесін көтерген, ал Зеленскийдің пікірінше, оны елдердің басшылары шешуі тиіс. Сондай-ақ ол ресейліктер басып алынған украин жерлерінің көлемін асыра көрсетіп отыр, шын жағдай украиндық майдан картасына жақынырақ деп мәлімдеді. Зеленский Украина үшін Еуропаның келіссөзге қатысуы және Киевтің, Еуропалық одақ пен АҚШ-тың ортақ ұстанымы, оның ішінде Украинаның ЕО мен НАТО-ға мүшелігі жөніндегі ұстанымы маңызды екенін атап өтті.
Әбу-Дабидегі кездесу 11 қарашада жалғасады. Зеленскийдің айтуынша, екінші күні тараптар шиеленісті бәсеңдету, энергетика, Қара теңіздегі қауіпсіздік, тұтқын алмасу мәселелерін және үш елдің басшылары кездесуінің ықтимал мүмкіндігін талқылайды. Бір күн бұрын Украина Ресейге теңізде және энергетикада бітім жасауды ұсынып, Мәскеудің жауабын күтіп отыр.
Тұтқын алмасу Ресеймен тікелей келіссөздердің ең нақты нәтижесі болып қала береді. Олардың ең ірісі, ол да «мыңға мың» форматында, 2025 жылғы мамырда Стамбулдағы делегациялар кездесуінен кейін өтті. Мыңдаған украин әскері мен бейбіт тұрғыны әлі күнге дейін Ресей тұтқынында отыр, украин билігі мен БҰҰ-ның мәліметінше, оларды азаптап, адамгершілікке жатпайтын жағдайда ұстайды.
