Қазгидромет 11 қарашаға, сәрсенбіге, дауылды ескерту жариялады. Ауа райының бұзылуы елдің басым бөлігін, соның ішінде Астана, Алматы және Шымкент қалаларын қамтиды. Синоптиктердің айтуынша, қар аралас жаңбыр жауып, көктайғақ болады, тұман түседі, желдің екпіні секундына 15–20 метрге жетеді. Ал Алматы мен Қонаевта, Алматы, Жетісу, Жамбыл және Қызылорда облыстарында өрт қаупі жоғары.
Алматыда күн айтарлықтай суытады: түнде де, күндіз де +5…+7 градус болып, қар аралас жаңбыр жауады. Медеу және Бостандық аудандарының таулы аймақтарында кей жерлерде қатты жауын-шашын күтіледі. Жел солтүстік-батыстан солтүстік-шығысқа ауысып, екпіні секундына 15–20 метрге жетеді. Шымкентте жаңбыр жауып, мезгіл-мезгіл тұман түседі, солтүстік-батыс желдің екпіні секундына 15–20 метрге жетеді, ауа температурасы +4…+6 градус шамасында болады. Астанада жауын-шашын күтілмейді, бірақ түнде және таңертең тұман түседі. Түнде −5…−7 градус, күндіз 0 градус шамасында.
ШҚО, Абай, Қарағанды, Ұлытау, Қызылорда және Ақтөбе облыстарында жаңбыр мен қар жауып, көктайғақ болады деп болжанып отыр. Ең қатты жауын-шашын ШҚО-ның солтүстігі мен таулы аудандарында, сондай-ақ Абай облысының оңтүстігінде, шығысында және орталығында күтіледі. Талдықорғанда қар аралас жаңбыр жауып, күндізгі температура күрт төмендеп, +6…+8 градусқа дейін түседі. Екпіні секундына 15–20 метрге жететін жел Тараз бен Петропавлда, Түркістан облысында және Қарағанды облысының оңтүстігінде де соғады.
Түнде және таңертең Ақмола, Павлодар, Қостанай, Атырау, Маңғыстау облыстарын, СҚО мен БҚО-ны, сондай-ақ Қарағанды, Павлодар, Орал және Жезқазған қалаларын тұман басады.
11 қарашада Астана, Қарағанды, Теміртау, Павлодар, Қостанай және Атырау қалаларында қолайсыз метеорологиялық жағдай күтіледі, яғни ауа әдеттегіден көбірек ластануы мүмкін. Қазгидромет тұрғындарға көшеде, әсіресе жол бойында, аз жүруге, балалар мен жүкті әйелдерге ұзақ серуендемеуге кеңес береді. Жүрек, өкпе аурулары мен аллергиясы бар адамдарға қажетті дәрі-дәрмекті жанында ұстау ұсынылады. Жаттығуларды үй ішіне ауыстырған дұрыс.
«ҚазАвтоЖол» компаниясы қар аралас жаңбырға байланысты 12 өңірдегі трассаларда көріну қашықтығы нашарлап, жол тайғақ болуы мүмкін екенін ескертті. Жүргізушілерге ауа райын ескеріп, арақашықтықты сақтау, жол жағдайына сай жылдамдық таңдау және кенет маневр жасамау ұсынылады.
Ауа райы бірнеше күннен бері құбылып тұр: 10 қарашада да барлық 17 облыста дауылды ескерту жарияланған еді, ал сейсенбі күні кешке Шымкентте нөсерден көшелерді су басып, қаланың бір бөлігі жарықсыз қалды.
