Шымкентте 10 қарашада ұзаққа созылған жаңбыр бірқатар көшені су астында қалдырды: жол мен тротуарларда су тұрып, жаяу жүргіншілер шалшықтан әрең өтті. Кешке бірнеше ықшамауданда жарық сөнді. Зардап шеккендер туралы хабарланған жоқ.
«Оңтүстік Жарық Транзит» энергетикалық компаниясының хабарлауынша, Жайлау, Тұран-2, Қызылжар және Ақниет ықшамаудандарында электр қуаты өшкен. Ол жаққа апаттық бригадалар шығып, желілер мен жабдықтарды тексеріп, ақауларды жойып жатыр. «Барлық жұмыс жедел режимде жүргізіліп жатыр», – деп мәлімдеді компания. Жарық барлық үйге қашан берілетіні айтылмады.
Шымкент қаласы әкімдігінің айтуынша, коммуналдық қызметтер күшейтілген режимге көшті. Арнайы техника мен бригадалар суды сорып, нөсер кәрізін, арықтар мен дренаж арналарын тазалап жатыр, қажет болса қосымша күш тартылады. Проблемалы жерлер шамамен әр 15 минут сайын аралап тексеріледі, жұмыс тәулік бойы жүріп жатыр. «Кейбір учаскелерде жаңбыр суының уақытша жиналуы – табиғи үдеріс», – деді әкімдікте.
Тұран ауданында су жиналуы мүмкін тоғыз учаске бақылауда. Ең қиын жерлерде – Республика даңғылындағы туннельде, Қонаев даңғылы мен Рысқұлов көшесінің қиылысында, Наурыз ықшамауданындағы Жанкент көшесінде және 112-кварталда сорғылар үздіксіз жұмыс істеп тұр. Онда барлығы 35 адам мен арнайы техника, соның ішінде бес ассенизациялық көлік пен төрт мотопомпа жұмылдырылған. Аудан әкімдігінің мәліметінше, тұрғындар су жиналғанын «Тұран» КММ диспетчеріне +7 705 705 11 57 нөмірі арқылы хабарлай алады.
Суды сорып шығару жұмысын Шымкент әкімдігі Instagram-да көрсетті:
Қазгидромет болжамы бойынша, 11 қарашада Шымкентте тағы да жаңбыр, қар және тұман күтіледі, жел екпіні секундына 15–20 метрге жетеді. Жауын-шашынсыз күн тек 12 қарашада болады: түнде −1…−3, күндіз +7…+9 градус.
Осы күндері ауа райы басқа қалаларда да қиындық тудырып отыр. Ақтауда 7 қарашадағы нөсерден кейін коммуналдық қызметтер бір тәулікте жолдардан шамамен 10 мың текше метр су сорып алды, ал Алматыда нөсер мен ылғалды қар туралы дауылды ескертуге байланысты 85 бригада кезекшілікте тұр.
