Америкалық Virgin Galactic компаниясы 28 қазанда жаңа туристік ғарыш кемесін алғаш рет көпшілікке көрсетіп, оған Apeiron деген ат берді. Сол күні Астана уақытымен кешке қарай кеме ұшақ-тасығыштың қанатының астында Аризонадағы зауыттан Нью-Мексико штатындағы Spaceport America ғарыш айлағына ұшып жетті. Бұл — компания ғарыш туристерінің ұшуларын қайта бастамақ болған жаңа Delta буынының алғашқы кемесі.
Кеменің атауы ашық дауыс беру арқылы таңдалды, оған 83 елдің тұрғындары қатысты. Apeiron ежелгі грек тілінен аударғанда «шексіз» деген мағына береді. Сол күні кеме алғаш рет түпкілікті бояуымен көрсетілді.
Apeiron әзірге өз күшімен ұшпайды. Оны Eve ұшақ-тасығышының астына бекітті. Ұшақ Астана уақытымен сағат 22:29-да Феникс-Меса әуежайынан көтеріліп, түн ортасына қарай Spaceport America ғарыш айлағына қонды. Ұшақты пилоттар Майкл Масуччи мен Дэн Аликс басқарды.
«Таңертең біз кемеге Apeiron деп ат қойдық. Түстен кейін Apeiron үйіне оралды», — деді компания басшысы Майкл Колглейзер.
Spaceport America-да инженерлер борттық электроника мен бағдарламаларды тексеруді аяқтайды, одан кейін ұшу сынақтары басталады. Алдымен кеме қозғалтқышсыз сырғанап ұшады, кейін зымыран қозғалтқышы қосулы ұшулар өтеді. Virgin Galactic жолаушылармен алғашқы коммерциялық рейсті 2027 жылдың екінші тоқсанының басында күтіп отыр. Сериядағы екінші кеме екінші тоқсанның соңында немесе үшінші тоқсанның басында жұмысқа кірісуі тиіс.
Ұшулар суборбиталық болады. Кеме атмосферадан жоғары көтеріледі, жолаушылар бірнеше минут салмақсыздық күйін сезініп, Жердің иілген көкжиегін көреді. Бірақ кеме орбитаға, яғни аппараттар ғаламшарды айналып ұшатын жолға шықпайды. Apeiron алты жолаушыға арналған, бұл бұрынғы VSS Unity кемесінен екі орынға көп. Компанияның дерегінше, жаңа кеме аптасына екі рет ұша алады және 500-ден астам ұшуға шыдайды.
Virgin Galactic компаниясының негізін британ кәсіпкері Ричард Брэнсон қалаған. VSS Unity кемесі соңғы рет 2024 жылғы маусымда ұшты. Содан кейін компания Delta кемелерін жасау үшін рейстерді тоқтата тұрды. Бұл кемелермен жолаушы тасымалын алдымен 2026 жылы бастау жоспарланған еді, бірақ бағдарламалық жасақтаманы пысықтауға байланысты мерзім шегерілді. Компанияның 100-ден астам болашақ жолаушысы ұшуға дайындықты бастап кетті.
