Астаналық «Барыс» қақпашы Дмитрий Николаевты рәсімдеуді аяқтады: 26 жастағы ресейлік ойыншының келісімшарты тіркеліп, 2028 жылғы 31 мамырға дейін жарамды. Маусымның ортасында клубқа жаңа қақпашы не үшін керек болғанын бас менеджер Леонид Метальников түсіндірді, деп хабарлады «Барыстың» баспасөз қызметі. Астанада Николаев Хантер Шепардтың орнын басады.
«Біз барлық қажетті рәсімдерді аяқтап, Николаевтың келісімшартын тіркедік. Оның „Барыспен“ келісімі 2028 жылғы 31 мамырға дейін жарамды. Маусым барысында қақпашылар қатарына сенімділік пен тереңдік қосу керек екені анық болды. Дмитрий — кубоктық матчтарда ойнаудың едәуір тәжірибесі бар, ұтқыр қақпашы. Оның шеберлігі плей-оффқа шығу жөніндегі бірінші кезектегі міндетімізді орындауға көмектеседі деп үміттенеміз. Хоккейші клубқа келіп жетті, бүгін алғашқы жаттығуын өткізеді», — деді Метальников.
Келісімге сарапшылар да баға берді. Өскемендік «Торпедоның» бұрынғы вице-президенті Юрий Петухов Sports.kz-ке берген сұхбатында мәмілені сәтті деп атап, Шепард туралы қатаң пікір айтты: «Әрине, Андрей Шутовқа сенімді екінші нөмір керек. Өйткені Шепард ҚХЛ-ға сай емес. Ол тек қақпа сызығында ғана ойнайды, шайбаның бәрі одан серпіліп кетеді. Хантер тіпті ұстағыш қолғапқа түсіп қойған шайбаны да түсіріп алады. Шутов шаршайды, оған сенімді сақтандырушы керек. Сондықтан Николаевпен келісімшарт жасалғаны өте жақсы».
Осы маусымда Николаев «Трактор» сапында 10 матч өткізіп, алты рет жеңіске жетті және соққылардың 92,8%-ын қайтарды. Шепардтың «Барыстағы» көрсеткіші әлдеқайда төмен — 13 ойында 87,5%, ал оның кететінін бас бапкер Михаил Кравец растаған.
Бұл ауысу Ресейде дау тудырды. Николаев 12 қарашада челябілік «Трактормен» айырбас арқылы Астанаға келді. Өтемақы мөлшерін клубтар ресми түрде атамады, ресейлік БАҚ мәліметінше, бұл — символдық 1000 рубль, яғни шамамен 5,4 мың теңге. Журналист Иван Невский қақпашыны «Спартак» қайтарып алуы мүмкін екенін айтқан, ал «Свободный лёд» порталы бұл оқиғаны «жасырын жалға алу деп аталатын тәсілге байланысты сұр схемалардың» мысалы деп атады. «Свободный лёдтың» келісім туралы жазбасы:
25 матчтан кейін «Барыс» 27 ұпай жинап, ҚХЛ Шығыс конференциясында бесінші орында тұр. 15 қарашада астаналықтар өз алаңында Шығыстың көшбасшысы — магнитогорлық «Металлургты» қабылдайды.
