«Нью-Орлеан Пеликанс» клубының 30 жастағы қорғаушысы Деджонте Мюррей өзін НБА-ның басқа клубына айырбастауды сұрады. Бұл өтінішті 13 қарашада, жұма күні, «Пеликанстың» өзі растады. «Бүгін Деджонте Мюррейдің өкілдері бізге оның айырбасқа түсу туралы өтінішін жеткізді. Біз ұйымымыздың мүддесіне сай келетін айырбас мүмкіндіктерін қарастырамыз», — делінген клуб мәлімдемесінде.
Бұдан бірнеше сағат бұрын ESPN инсайдері Шэмс Чарания Мюррей, оның агенті — Klutch Sports агенттігінің басшысы Рич Пол — және клуб басшылығы шешім іздеп жатқанын хабарлаған. Чарания мәліметінше, ойыншы клубқа «басқа жерде маңызды баскетболда негізгі рөл атқаруға дайын» екенін жеткізген.
«Нью-Орлеан» маусымды сәтсіз бастады: 4 жеңіс, 8 жеңіліс, оның ішінде қатарынан төрт рет ұтылды. Соңғысы — өз алаңында «Бруклиннен» 111:145 есебімен ойсырай жеңілу. Бұл ойында Мюррей 5 ұпай жинап, пайдалылық көрсеткіші «минус 33» болды. Әлеуметтік желідегі бір аккаунт Мюррей алаңда болғанда «Пеликанс» тоғыз матчтың тек біреуінде жеңгенін, ал ол жоқта үш ойынның үшеуін де ұтқанын есептеп шығарды. Қорғаушы X желісінде оған: «ІШТЕ болып жатқанға қарағанда, біреу саған осыны айт деп жазған сияқты! „САБОТАЖ“ ШЫН!» — деп жауап берді. Кейін жазба өшірілді.
Бұл маусымда Мюррей бір матчта орта есеппен 13,4 ұпай жинап, 4,6 рет доп іліп алып, 4,4 пас беріп жүр. Жұма күні «Мемфиспен» өткен НБА Кубогының матчына ол сол жақ тобығының созылуына байланысты шықпады. Оның осы маусымдағы жалақысы — 32,8 млн доллар (шамамен 14,6 млрд теңге), ал келесі маусымға 30,8 млн долларлық (шамамен 13,7 млрд теңге) ойыншы опциясы бар.
«Пеликанс» Мюррейді 2024 жылдың жазында «Атлантадан» алып, оның орнына Дайсон Дэниелсті, Ларри Нэнс-кішіні, Эй Джей Лидделлді және бірінші раундтың екі драфт құқығын берген. Нью-Орлеанда ол жарақаттан арылмады: клуб сапындағы алғашқы матчында қол басының сүйегі сынды, ал 2025 жылғы қаңтарда оң аяғының ахилл сіңірі үзілді. Соңғы үш маусымда Мюррей небәрі 54 матч ойнады. 2026 жылғы ақпанда ол айырбас сұрап жатыр деген қауесетті жоққа шығарған. Мюррей — 2022 жылғы Жұлдыздар матчының қатысушысы, ал 2023/24 маусымында «Атланта» сапында орта есеппен 22,5 ұпай жинаған.
