Air Astana Мысырдағы Шарм-эль-Шейхке ұшатын рейстерін тұрақты кестеге көшіреді: алғашқы ұшақ Алматыдан 10 желтоқсанда, Астанадан 11 желтоқсанда ұшады. Бұған дейін әуекомпания бұл курортқа туристерді тек чартер рейстерімен тасып келген, сондықтан билет көбіне тур құрамында сатылатын. Енді билетті бөлек сатып алып, қонақүй мен сапар күндерін өзі таңдауға болады, деп хабарлады Air Astana. Компанияның пікірінше, тұрақты рейстер туристерге «күзгі-қысқы маусымда Мысырға сапарды икемді жоспарлауға» мүмкіндік береді.
Рейстер әр қаладан аптасына екі рет Airbus A321 ұшағымен орындалады. Уақыт жергілікті уақыт бойынша көрсетілген:
- Алматыдан — дүйсенбі және бейсенбі күндері: KC8275 рейсі 07:20-да ұшып, Шарм-эль-Шейхке 11:50-де қонады, жолда 7 сағат 30 минут; кері KC8276 рейсі 12:50-де ұшып, Алматыға 22:10-да жетеді;
- Астанадан — сейсенбі және жұма күндері: KC8277 рейсі 06:50-де ұшып, 10:45-те қонады, жолда 6 сағат 55 минут; кері KC8278 рейсі 11:55-те ұшып, Астанаға 20:50-де жетеді.
Барлық алымдарды қосқанда екі жаққа ең арзан билет Алматыдан эконом-класта 283 690 теңге, бизнес-класта 597 864 теңге тұрады, Астанадан — 283 734 және 588 932 теңге. Билетті Air Astana сайты мен қосымшасынан, әуекомпанияның сату кеңселерінен және туристік агенттіктерден сатып алуға болады.
21 жасқа толған қазақстандықтар Шарм-эль-Шейхте 15 күнге дейін демалу үшін визаны тікелей курорт әуежайында ресімдей алады, деп еске салды Air Astana. Қазақстан Сыртқы істер министрлігінің мәліметінше, 21 жасқа толмағандар Мысырға тек әкесімен немесе анасымен бірге кіре алады. Ал Каирге, Хургадаға немесе елдің басқа қалаларына баратындар визаны Мысырдың Қазақстандағы елшілігінен алдын ала алуы керек.
Қазан айында екі елдің сыртқы істер министрлері Мысыр қазақстандық туристердің елге кіруін жеңілдетіп, Қазақстанды қосымша талаптар қойылатын Орталық Азия елдерінің тізімінен шығаратыны туралы келісті. Алайда нақты қай шектеулер қай күннен бастап алынатынын СІМ ол кезде айтпаған. Курортта жағажайдан басқа немен айналысуға болатынын airpress.kz «Пирамидадан басқа Мысыр» материалында жазған.
