Абай облысында полицейлер 2023 жылғы қыркүйекте хабар-ошарсыз кеткен ер адамды өлтіру ісін ашты. Күдікті қылмысын мойындап, мәйітті қайда жасырғанын көрсеткен, ал айыптау қорытындысы бар қылмыстық іс сотқа жолданды. Бұл туралы 14 қарашада ІІМ хабарлады.
2023 жылғы қыркүйекте полицияға бір әйел жүгінген: оның күйеуі жұмыс іздеп кетіп, хабарласпай қалған. Ол кезде іздестіру және жедел-іздестіру шаралары нәтиже бермеген. Министрліктің атап өтуінше, іс бойынша жұмыс тоқтамаған: полицейлер түрлі нұсқаларды пысықтап, оның жоғалуына қатысы болуы мүмкін адамдарды іздеген.
Ақыры жедел қызметкерлер кісі өлтіргеннен кейін басқа қылмысы үшін сотталып, бас бостандығынан айыру орындарында жазасын өтеп жүрген ер адамға шыққан. Оның ер адамның жоғалуына қатысы бар-жоғы жеке тексерілді. ІІМ мәліметінше, ол мойындау жауабын беріп, кісі өлтірудің мән-жайын егжей-тегжейлі айтып, мәйітті жасырған жерін көрсеткен. Ведомство қаза тапқан адам мен күдіктінің аты-жөнін, қылмыстың орны мен мән-жайын жария еткен жоқ.
Қылмыстың ашылуы туралы видеоны ІІМ жариялады:
Министрлік өткен жылдардағы қылмыстар бойынша жұмысты жалғастыратынын мәлімдеді: олардың әрқайсысы құқықтық баға алуы тиіс, ал жазаның бұлтартпастығы қағидаты полицияның басымдығы болып қала береді. Бұған дейін ІІМ Астанада 21 жыл бұрын болған кісі өлтіру ісін ашқанын хабарлаған еді.
