Қазақстанның U-19 жасөспірімдер құрамасы 14 қарашада 19 жасқа дейінгі футболшылар арасындағы 2027 жылғы Еуропа чемпионатына іріктеудің екінші раундында, А лигасындағы A2 тобының екінші турында Бельгия құрамасынан 0:2 есебімен жеңілді. Ойын Шотландияның Камбернолд қаласындағы «Броудвуд» стадионында өтті. Бұл туралы Sports.kz хабарлады.
Бірінші тайм голсыз аяқталды. 58-минутта бельгиялық Аугуст де Ваннемакер қапталдан берілген доптан кейін қақпаның жоғарғы бұрышына күшті соққы жасап, есепті ашты. 75-минутта ол пенальтиді де мүлтіксіз орындап, дубль жасады.
Екі турдан кейін Қазақстан ұпайсыз келеді және топ кестесінің соңғы орнында тұр. Бірінші турда Косовоны 2:0 есебімен ұтқан Бельгия алты ұпай жинады, сондықтан қазақстандықтар оны енді қуып жете алмайды. 17 қарашада соңғы турда Тимур Қасымовтың шәкірттері Эйрдри қаласындағы «Эксельсиор» стадионында Косовомен ойнайды, ал бельгиялықтар мини-турнир иесі Шотландиямен кездеседі. Екі матч та Қазақстан уақытымен сағат 20:00-де басталады.
Іріктеуді қазақстандықтар 11 қарашада Шотландиядан 1:3 есебімен жеңілуден бастады: жалғыз голды «Оңтүстік» жартылай қорғаушысы Дінмұхаммед Махмудов соқты. Ал Қазақстанның U-17 құрамасы өз іріктеуінде Австрияны 7:0 есебімен ойсырата жеңді.
