Қазақстан чемпионы, астаналық «Номад» хоккей клубы 14 қарашада Континенттік кубоктың екінші раундындағы D тобының екінші турында румыниялық «Корона Брашовты» 5:2 есебімен жеңді. Континенттік кубок – Халықаралық хоккей федерациясы (IIHF) Еуропа елдерінің чемпион клубтарына арнап өткізетін турнир. Екі жеңістен кейін астаналықтар алты ұпай жинап, Италияның Азиаго қаласында ойнап жатқан топты бастап тұр. Бұл туралы Sports.kz хабарлады.
Есепті жетінші минуттың өзінде Абзал Әлібек ашты. Екінші кезеңде «Номад» тағы үш шайба соқты: 22-минутта Даниил Цыбин, 27-минутта Никита Сытников, 31-минутта Кирилл Панюков көзге түсті. Үшінші кезеңде, 44-минутта, бесінші шайбаны Александр Мигунов соқты.
Екінші раундтағы соңғы ойынын «Номад» 15 қарашада даниялық «Херлев Иглзге» қарсы өткізеді. Матч Қазақстан уақытымен сағат 20:30-да басталады. Даниялықтар бірінші турда «Корона Брашовты» 2:1 есебімен ұтқан.
Азиагодағы турнирді астаналықтар 13 қарашада «Азиагоны» 3:2 есебімен жеңумен бастады: шешуші шайбаны ойын аяқталуына үш минут қалғанда кемшілікте ойнап жүріп Артём Королёв соқты. «Номад» Континенттік кубокты бұрын да жеңіп алған: 2024 жылғы қаңтарда Кардиффте команда финалдық турнирде бірде-бір рет жеңілмей, «Кардифф Девилзді» (5:2), «Хернинг Блю Фоксты» (7:2) және «Катовицені» (3:1) ұтты.
«Номадтың» қорғаушысы Кирилл Никитин қараша айының басында Қазақстан құрамасымен бірге Азия чемпионы атанды: турнирдің басында ол Жапония қақпасына жеңіс шайбасын соқты.
