UFC-дің екі салмақ дәрежесіндегі бұрынғы чемпионы Алекс Перейра мен ресейлік ауыр салмақтағы жекпе-жекші Сергей Павлович UFC 335 турнирінде өтетін жекпе-жегі алдында алғаш рет бетпе-бет келді. Бұл 13 қарашада, жұма күні, Нью-Йорктегі «Мэдисон Сквер Гарден» аренасының Infosys Theater залында өткен UFC 335 және UFC 336 турнирлерінің ортақ баспасөз мәслихатында болды. MMA Fighting жазуынша, жекпе-жекшілер бір-біріне сыпайы қарап, ешқандай оқиғасыз тарасты.
Сахнада ең қызу көріністі бразилиялық Карлос Пратес пен эквадорлық Майкл Моралес көрсетті. Олар 30 қаңтарда Торонтода өтетін UFC 336 турнирінде жартылай орта салмақтағы уақытша белбеуді сарапқа салады. Екеуі бетпе-бет келгенде UFC басшысы Дана Уайтқа оларды ажыратуға тура келді. Пратес сол баспасөз мәслихатында чемпион Ислам Махачевті еріншек деп атады. Ал UFC 335-тің басты жекпе-жегінде символдық BMF белбеуі үшін кездесетін Чарльз Оливейра мен Диего Лопес бетпе-бет келер алдында құшақтасты.
Күтпеген жағдай да болды. UFC 336-ның басты жекпе-жегінде Манел Кейпке қарсы чемпиондық атағын үшінші рет қорғайтын 57 келіге дейінгі салмақтағы чемпион Джошуа Ван журналистердің сұрақтарына жауап беру үшін сахнаға шықпады. Белбеу үміткердің қолында қалды, ал Кейп қарсыласының келмегенін мысқылдап өтті, деп жазады Bloody Elbow. Ван тек бетпе-бет келу рәсіміне ғана үлгерді.
UFC 335 және UFC 336 баспасөз мәслихатының толық жазбасы YouTube-та:
UFC 335 турнирі 12 желтоқсанда Лас-Вегастағы «Т-Мобайл Аренада» өтеді. Перейра мен Павлович бес раундтық қосалқы басты жекпе-жекте кездеседі. 39 жастағы бразилиялық үшін бұл ауыр салмақтағы екінші жекпе-жек: 14 маусымда Ақ үй жанында өткен UFC Freedom 250 турниріндегі дебютінде ол қазіргі чемпион Сириль Ганға техникалық нокаутпен жеңілген. Павлович ауыр салмақтағылар рейтингінде екінші орында, ол соңғы үш жекпе-жегінде Жаирзиньо Розенстрайкты, Вальдо Кортес-Акостаны және Таллисон Тейшейраны жеңді, соңғысын бір минутқа жетпей нокаутқа түсірді. UFC анонсында бұл жекпе-жек Перейраның чемпиондық белбеу үшін күреске оралу мүмкіндігі деп аталады. Ганның өзі 15 қарашаға қараған түні Джош Хокитке қарсы белбеуін қорғайды — екі жекпе-жекші де салмақ өлшеуден өтті.
