UFC-дің бразилиялық жекпе-жекшісі Карлос Пратес жартылай орта салмақтағы чемпион Ислам Махачев одан қашып жүрген жоқ, жай ғана еріншектік танытып отыр деп мәлімдеді. Пратес бұл сөзді 13 қарашада Нью-Йорктағы «Мэдисон Сквер Гарденде» UFC 335 және UFC 336 турнирлері алдында өткен баспасөз мәслихатында айтты.
Махачев сізден жалтарып жүр ме деген сұраққа бразилиялық былай деп жауап берді: «Шынымды айтсам, жоқ. Меніңше, оған жаңа жаттығу лагерін бастауға сәл ерінішті болуы мүмкін. Мүмкін, Иэн Гэрримен жекпе-жектен кейін демалысын қызықтағысы келетін шығар. Ол өзінше: «Әй, жаттығу лагерін өткізуім керек. Сәл ерінемін. Рамаданнан кейін жекпе-жекке шығайық» деп ойлаған». Содан кейін Пратес чемпионның өзіне үндеу тастады: «Жасырынба. Моралесті нокаутқа жіберген соң, қайта ораламын да, Ислам Махачевті ММА-дан зейнетке жіберемін».
Баспасөз мәслихатының осы сөздер айтылған үзіндісін Home of Fight MMA-порталы X әлеуметтік желісінде жариялады:
Пратес 30 қаңтарда Торонтода өтетін UFC 336 турнирінің қосалқы басты жекпе-жегінде жеңілмеген эквадорлық Майкл Моралеспен жартылай орта салмақтағы уақытша белбеу үшін кездеседі. Бастапқыда бразилиялық Махачевпен негізгі титул үшін жекпе-жек туралы келіссөз жүргізген, бірақ чемпион UFC-ге қаңтарда жекпе-жекке дайын болмайтынын хабарлаған.
30 қазанда Махачев X әлеуметтік желісінде келесі жекпе-жегі кәсіби мансабындағы соңғыларының бірі болатынын жазды. Бұған дейін чемпион Пратес — Моралес жұбының жеңімпазымен кездескісі келетінін де айтқан. Махачевтің мансабын аяқтау туралы сөзіне UFC-дің жартылай орта салмағында өнер көрсететін қазақстандық Шавкат Рахмоновтың командасында да үн қатты. «Ислам бәріне бәрін дәлелдеп қойды. Ол — осы спорттың аңызы. Мансабын жалғастыру не аяқтау — өз еркі», — деді DAR Team бас бапкері Эдуард Базров Sports.kz порталына.
Махачев 2025 жылдың қарашасында Джек Делла Маддаленаны жеңіп, жартылай орта салмақтағы белбеуді иеленді, ал 2026 жылдың тамызында Иэн Гэрримен жекпе-жекте титулын қорғап қалды. Оған дейін ресейлік UFC-дің жеңіл салмақтағы чемпионы болған.
