Димаш Құдайберген The Muslim 500 жыл сайынғы анықтамалығына – әлемдегі ең ықпалды 500 мұсылманның 2027 жылға арналған тізіміне енді. Қазақстандық әнші «Өнер және мәдениет» бөлімінде, Қазақстан блогында көрсетілген. Аммандағы Корольдік ислам стратегиялық зерттеулер орталығы (RISSC) әзірлейтін анықтамалықтың жаңа шығарылымы The Muslim 500 сайтында жарияланды.
Құрастырушылар әншіні былай сипаттайды: «Димаш Құдайберген – сирек кездесетін алты октавалық вокалдық диапазонымен танылған, әлемге әйгілі қазақстандық әнші, ән авторы және мультиинструменталист. Шығыс Азияда бір түнде сенсацияға айналған ол Қытайда, Ресейде және Қазақстанда ірі музыкалық марапаттарға ие болды. Оның YouTube арнасындағы қаралымдар саны жарты миллиардтан асады, ал туған қаласы Ақтөбеде оған арналған мұражай бар. БҰҰ-ның көші-қон мәселелері жөніндегі ізгі ниет елшісі Құдайберген өзінің жаһандық алаңын гуманитарлық мақсаттарда белсенді пайдаланады. Жуырда ол өте табысты DiMENSIONS әлемдік турын бастады, Voice Beyond Horizon халықаралық телевизиялық жобасының атқарушы продюсері болды және Yazgı атты кроссовер-хит синглімен әлемдік чарттарда бірінші орынға шықты».
Бұл – анықтамалықтың 18-шығарылымы. Ондағы алғашқы 50 адам орны бойынша рейтингке енгізілген, қалған 450 адам рейтингсіз 13 санатқа бөлінген. Құрастырушылар мұсылман әлеміне айтарлықтай әсер ете алатын мәдени, идеялық, қаржылық, саяси немесе өзге де ықпалы бар адамды ықпалды деп санайды. «Өнер және мәдениет» бөлімінде Димашпен қатар үнді актерлері Шахрух Хан, Салман Хан және Аамир Хан, композитор А. Р. Рахман, малайзиялық әнші Сити Нурхализа, пәкістандық сопылық музыка орындаушысы Абида Парвин, британ актері Риз Ахмед және түрік жазушысы Орхан Памук бар. Қазақстаннан анықтамалыққа Президент Қасым-Жомарт Тоқаев та енген – ол саяси бөлімде көрсетілген.
Димаш The Muslim 500 тізіміне алғаш рет 2022 жылғы қарашада, 2023 жылға арналған шығарылымда енген. Қазір әнші DIMENSIONS әлемдік турымен Латын Америкасында жүр: 11 қарашада ол турдың Латын Америкасындағы бөлігін Меридада бастады, ал 14 қарашада Монтеррейде өнер көрсетеді. Концерт жергілікті уақытпен сағат 20:00-де басталады, бұл кезде Астанада 15 қарашаның таңғы 07:00-і болады. Одан кейін – 17 қарашада Гвадалахарада және 19, 20 қарашада Мехикода екі концерт өтеді.
