Петропавлда әлеуметтік жағынан осал отбасылар мен кезекте тұрғандарға арналған Жұмабаев көшесі, 282 мекенжайындағы 126 пәтерлі жаңа үйдің тұрғындары дербес шот аша алмай, коммуналдық қызмет ақысын төлей алмай отыр. Олар шатырдың ағатынына және пандустың жұмыс істемейтініне де шағымданады. Қала әкімдігі тұрғындарға алдымен мүлік иелерінің бірлестігін (МИБ) құру керек екенін, әйтпесе коммуналдық ақы сот арқылы өндірілетінін айтты. Үйдегі ақауларды тексеріп, кепілдік бойынша жоюға уәде берді.
Тұрғындар түбіртек алып тұр, ақысын төлеуге де дайын, бірақ олардың айтуынша, коммуналдық қызметтердің тізілімінде бұл үй жоқ: ол балансқа берілмеген. «Қоныстанғаннан бері 8 ай өтті, бірақ осы уақытқа дейін МИБ құрылмаған», — деді Петропавл қаласы әкімінің баспасөз хатшысы Алёна Хан. Тәртіп мынадай: алдымен МИБ құрылады, содан кейін үйдің ортақ шоты, тек сонан соң пәтерлердің дербес шоттары ашылады. Тұрғындар бұған дейін бұл іске кіріспегенін пәтерлердің үш кезеңмен бөлінгенімен, соңғы қоныстанушылардың жақында ғана көшіп келгенімен түсіндіреді. Енді олар МИБ құрмақ.
Тұрғындардың құрылысқа қатысты наразылығы көп. Жаңбырдан кейін шатырдан аққан су сегізінші және тоғызыншы қабаттарды басады: үйде су ағызатын құбырлар жоқ. Ғимараттың айналасында іргесін қорғайтын жабын (отмостка) жоқтың қасы, сондықтан бірінші қабаттарда суық, жәндіктер шығады. Терезеден жел өтеді, кіреберістер мен аулада жарық жоқ, лифт үзіліспен жұмыс істейді, пандус істемейді. «Екінші топтағы адамға алтыншы қабаттан қалай пәтер беруге болады?» — дейді бала кезінен мүгедектігі бар, баспанаға 14 жыл кезекте тұрған Айпери Кубанычбеккызы. Қоқыс та бөлек мәселе: контейнер алаңы асфальтталмаған, ал тұрғындар келісімшарт жасағысы келген компания қалдықты шығару техникалық тұрғыдан мүмкін емес дейді.
«Астана» телеарнасының үйдегі мәселелер туралы сюжеті:
Мердігер өкілі Нұрлан Сапаров ақауларды үйдің 2024 жылы тапсырылып, тек 2026 жылы ғана қоныстана бастағанымен байланыстырады: үй бір жарым жылға жуық бос тұрған. Оның айтуынша, терезеге қатысты ескертулер жойылды. Мердігер тұрғындармен және әкімдік өкілдерімен сенбі, 14 қараша күні сағат 15:00-де үйді бірге аралап, барлық ескертуді тіркеуге, кейін оларды «шамамен 15–20 күн ішінде» жоюға келісті. Компанияның еске салуынша, үйге берілген кепілдік қоныстанған күннен бастап екі жыл жарамды. Ал әкімдік мәселелердің едәуір бөлігі үйді дұрыс пайдаланбаудан туындағанын, оларды басқарушы компания немесе МИБ төрағасы шешуге тиіс екенін айтады. Қалалық құрылыс бөлімі мердігермен бірге үйді тексеріп жатыр, бұзушылық анықталса, кепілдік аясында жойылады.
