Димаш Құдайберген Мексиканың Монтеррей қаласына ұшып келді. Әнші мұнда 14 қарашада DIMENSIONS әлемдік турының Латын Америкасындағы екінші концертін береді. Қазақстанның халық әртісін әуежайда көптеген жанкүйер күтіп алды, деп хабарлады әншінің ресми порталы DimashNews.
Жанкүйерлер плакаттар, баннерлер, әртістің суреттері мен сәлемдесу жазуларын ала келді. Димаш көрінген сәттен-ақ зал «Димаш!», «Мексикаға қош келдің!», «Монтеррейге қош келдің!» деген қуанышты айғайға толды.
Баннерлердің ішінде ерекше көзге түскені — жақында Монтеррей орталығында пайда болған, Димаштың құрметіне салынған муралдың бейнесі бар үлкен кенеп. Муралды салу идеясын жергілікті Dimash&DearsRegiasMty фан-клубы Мексикадағы Dears por Dimash жанкүйерлер бірлестігінің қолдауымен ұсынды. Жанкүйерлер қабырғаны таң сәріден күн батқанша өздері дайындады: оны тазалап, ескі жабынын алып тастады. Ал суретті суретші Антонио Рейна (Antonio Reyna) салды. Жоба қатысушыларының айтуынша, мурал әншіге және оның шығармашылығына деген махаббат пен терең құрметпен жасалған.
Монтеррейдегі концерт 14 қарашада Auditorio Banamex алаңында өтеді. Ол жергілікті уақытпен сағат 20:00-де басталады, бұл кезде Астанада 15 қарашаның таңғы 07:00-і болады. Одан кейін Димаш 17 қарашада Гвадалахарада, 19 және 20 қарашада Мехикода екі рет өнер көрсетеді. Мексикадан соң тур Боготада (22 қараша), Сантьягода (24 қараша) және Лимада (1 желтоқсан) жалғасады.
Әнші турдың Латын Америкасындағы бөлігін 11 қарашада Мерида қаласында бастады. Димаш бұл концертті балалық арманының орындалуы деп атап, «Historia de un Amor» болеросын дайындықсыз орындады. DIMENSIONS әлемдік туры 18 қазанда Польшаның Краков қаласында басталды, Мексикаға дейін Димаш Германия мен Испанияда да өнер көрсетті. Бір жыл бұрын ол Мексикаға алғаш келіп, Stranger туры аясында Мехикода екі мәрте аншлаг жинады.
