Атлант мұхитынан келген «Чарльз» дауылы үш күнде Португалиядан бастап Испания мен Францияның оңтүстігі арқылы Италияға дейін жетті. Нөсер жаңбыр, екпінді жел, су тасқыны мен көшкін салдарынан жүздеген әуе рейсі тоқтатылды, ал Португалияда тұрғындардың есінде алғаш рет бір ғана дауылға бола елдегі барлық мектеп жабылды. 13 қарашада, жұма күні, дауылдың негізгі соққысы Италияның солтүстігіндегі Тоскана мен Лигурияға тиді.
«Чарльз» Португалияға 11 қарашада, сәрсенбі күні жетті. Reuters агенттігінің хабарлауынша, әуе компаниялары елге келетін және елден ұшатын 200-ден астам рейсті тоқтатты: тек Лиссабон әуежайының өзінде 183 рейс, яғни әдеттегі қозғалыстың үштен біріне жуығы ұшпай қалды. Мадридтегі Барахас әуежайында 155 рейс тоқтатылды. AP агенттігінің мәліметінше, Португалияда 8 мыңға жуық мектеп жабылды. Мадейра аралында желдің екпіні сағатына 136 шақырымға жетті.
Кейін дауыл Францияның оңтүстігіне ойысты. Ницца, Канн және Манделье-ла-Напуль қалаларында көшелерді су басып, жолдар жабылды, кей жерлерде 140 миллиметрге дейін жауын-шашын түсті. Ниццада өрт сөндірушілер Пайон өзені маңындағы туннельдерге ағынмен кеткен екі ер адамды құтқарды. Connexion басылымының жазуынша, жұма күні таңертең Францияда қаза тапқан немесе ауыр жарақат алған адам болған жоқ.
Италияда бейсенбі күні Тосканың бір бөлігіне — Луниджана, Гарфаньяна және Рено өзенінің алабына қауіптің ең жоғары, қызыл деңгейі жарияланды. Тоскана Азаматтық қорғау қызметінің жұма күнгі сағат 11:00-дегі мәліметінше, Пиза провинциясында 72 адам үйінен алдын ала көшірілді, Пиза мен Лукка провинцияларында тағы 27 тұрғын эвакуацияланды, ал Ареццо, Лукка және Масса-Каррара провинцияларында 124 адам сыртқы әлемнен оқшауланып қалды. Сансеполькрода көшкін Монтанья ауылына баратын жолды толық қиратты, ауыл тұрғындарының бір бөлігі тікұшақпен шығарылды.
Лигурияда жұмаға қараған түні Генуя маңындағы Караско коммунасында көшкін тұрғын үйге қауіп төндірді, одан 10 адам көшірілді. Специяда сырғыған топырақ ұзындығы шамамен 20 метр болатын тірек қабырғаны құлатып, тұрақтағы көліктерді басып қалды. Топырақ астында адам қалмағаны анықталды, бірақ үйінді үстінде тұрған екі үйдің тұрғындары көшірілді: 20-дан астам адам түнді туыстары мен достарының үйінде өткізді, деп хабарлады ANSA агенттігі.
Жұма күні Тосканың, Лигурияның, Эмилия-Романья мен Лацио өңірлерінің бір бөлігінде қауіптің қызғылт сары деңгейі сақталып тұр. Синоптиктердің болжауынша, нөсер жаңбыр одан әрі Италияның оңтүстігі мен Балқанға ауысады. ANSA агенттігінің жазуынша, сенбіде Италияда ауа райы жақсарады, бірақ жексенбіде елдің орталығы мен оңтүстігіне тағы да жаңбыр келеді.
«Чарльз» — осы маусымда Еуропаның оңтүстік-батысында «Адам» мен «Брунадан» кейін ат қойылған үшінші дауыл, оған 9 қарашада Португалияның Теңіз және атмосфера институты (IPMA) ат берді. Бұл — құйын емес, ұзаққа созылатын жаңбыр әкелетін Атлант циклоны. Ал оған дейін, 8 қарашадан бастап, Португалия мен Испанияда бірнеше күн бойы «Бруна» дауылы нөсер жаудырған еді.
