UFC-дің ең жеңіл салмақтағы бұрынғы чемпионы Мераб Двалишвили қамаудан босағаннан кейін Әбу-Даби билігінен қонақүйдегі төбелес үшін сотталғандардың бәрін, соның ішінде Усман Нұрмағомедовты да босатуды сұрады. Грузин спортшы Instagram-дағы сторисінде айып тақпайтынын жазды. Оның үндеуінің мәтінін 13 қарашада, жұма күні, The National жариялады.
«Барлығыңызға мені босатқанын, жағдайымның жақсы екенін, сау екенімді және сайысқа шығуға дайын екенімді хабарлағым келеді. Бұл мәселені шешуге көмектескен Әбу-Дабидегі барлық адамға алғыс айтамын. Әбу-Дабиге келгенді жақсы көремін және мұнда мені қабылдайтынына қуаныштымын. Олар бәрін босатады деп қатты үміттенемін — мен айып тақпас едім. Мен бейбітшілікті және бәріне ең жақсысын қалаймын. Махаббаттарыңыз бен қолдауларыңыз үшін бәріңізге рахмет», — деп жазды Двалишвили.
Сол күні Әбу-Даби қылмыстық соты Усманды қоса сегіз адамды алты айға бас бостандығынан айырды. Әрқайсысына 300 мың дирхамнан — шамамен 36 млн теңгеден — айыппұл салынды, ал жазасын өтеген соң олар БАӘ-ден шығарылады. Олар қоғамдық қауіпсіздікті бұзғаны, дүрбелең тудырғаны және адамдардың өміріне қауіп төндіргені үшін кінәлі деп танылды. Двалишвилидің өзі және оның 21 жастағы досы Саба Лазишвили 50 мың дирхамнан, шамамен 6 млн теңгеден айыппұл төлеумен құтылды.
UFC басшысы Дана Уайт бейсенбіде-ақ төбелесті ақымақтық деп атаған болатын. Енді ол Eurosport-қа берген сұхбатында мұндай қақтығыстар Нұрмағомедовтар лагерімен бірге жүретінін айтты. «Хабибтің бүкіл командасы қайда барса да, онда әдетте төбелес болады, не болмаса Хамзат пен осы жігіттердің бәрі», — деді ол. Уайттың сөзінше, RAF турнирлерінде төбелес «шынында да, осындай шаралардың әрқайсысында» болады. «Адамдар менен үнемі: «Бұл саған жақсы емес пе?» деп сұрайды. Жоқ, бұл ешқашан жақсы емес», — деп атап өтті UFC басшысы. Ислам Махачевтің пікірі басқа: UFC-дің жартылай орта салмақтағы чемпионы әрі Усманның көп жылғы командаласы досын жақтап шықты және жанжалды Двалишвилидің өзі бастағанын айтты.
Дана Уайт Әбу-Дабидегі төбелес жайлы айтқан Eurosport сұхбаты:
14 қарашада, сенбі күні кешке, Двалишвили «Этихад Аренада» өтетін RAF Abu Dhabi күрес турнирінде өнер көрсетеді. Аралық салмақтағы белдесуде ол UFC-дің бұрынғы жекпе-жекшісі, бразилиялық Марлон Мораеспен кездеседі. Лазишвили турнирден шеттетілген Умар Нұрмағомедовтың орнын басып, UFC Даңқ залының мүшесі Юрайя Фейбермен кәсіби деңгейдегі алғашқы белдесуін өткізеді.
Төбелес 11 қарашада, сәрсенбі күні, Yas Hilton қонақүйінің фойесінде болды: Двалишвили сұхбат беріп тұрған кезде Усман мен оның айналасындағылар оған шабуыл жасады. Араздық 2025 жылғы қаңтардан бері жалғасып келеді: сол кезде Двалишвили UFC 311 турнирінде Умар Нұрмағомедовты төрешілер шешімімен жеңіп, чемпиондық белбеуін қорғап қалған. 2026 жылғы шілдеде екі тарап Грузиядағы RAF турнирінде де қақтығысқан еді.
