Solana (SOL) криптовалютасы 14 қарашада шамамен 6%-ға арзандап, түнде 75 доллардан төмен түсті – бұл тамыз айының ортасынан бергі ең төменгі деңгей. Investing.com келтірген CoinGecko деректеріне сәйкес, таңертең SOL 75,83 доллар тұрды. Астана уақытымен сағат 14:15 шамасында монета 75,52 доллардан (бір тәулікте −5,4%) саудаланды, ал Bitcoin.com News мәліметінше, күндізгі ең төменгі бағасы шамамен 74,85 доллар болды. Қазір бір SOL шамамен 33,6 мың теңге тұрады.
Жеті күнде Solana шамамен 16%-ға, 30 күнде 26%-ға арзандады. Баға 2025 жылғы қаңтарда белгіленген 293 доллардан асатын тарихи шегінен 74%-ға жуық төмендеді. Solana – қосымшалар мен төлемдерге арналған блокчейн-платформа, ал SOL – оның өз монетасы әрі нарықтық құны бойынша ең ірі криптовалюталардың бірі.
Solana бүкіл криптонарықпен бірге құлдырап жатыр. 14 қарашада биткоин 67 мың доллардан төмен түсті, Ethereum 2,6%-ға арзандап, 1907 долларға дейін төмендеді. CoinGlass деректері бойынша, бір тәулікте криптобиржалар қарызға сауда жасаған трейдерлердің 1,47 млрд долларлық позициясын мәжбүрлі түрде жапты, оның 1,31 млрд доллары бағаның өсуіне есептелген позициялар еді. Нарыққа АҚШ Федералдық резервтік жүйесі желтоқсанда мөлшерлемені көтереді деген күтім мен криптовалюталарға арналған биржалық қорлардан ақшаның кетуі қысым жасап отыр.
Бағаға Solana желісінде мемкоиндер шығаратын Pump.fun платформасы да қосымша қысым жасап отыр. Ол Kraken биржасына тағы 64 666 SOL (шамамен 5,19 млн доллар) аударды, ал барлығы орташа есеппен 158 доллардан шамамен 887,6 млн долларлық монета сатқан, деп Bitcoin.com News жазды.
Құлдырау экожүйенің басты конференциясы – 15–17 қарашада Лондондағы Olympia көрме орталығында өтетін Solana Breakpoint қарсаңына тұспа-тұс келді. 12 қарашада АҚШ-тағы бағалы қағаздар бойынша есеп айырысу жүргізетін DTCC американдық депозитарийі 2027 жылы Solana желісінде токенделген акциялар, биржалық қорлар және АҚШ мемлекеттік облигацияларын шығаруды жоспарлап отырғанын хабарлады. Бұған дейін AIR Press биткоиннің құлдырауы салдарынан Майкл Сэйлордың Strategy компаниясының қағаз жүзіндегі шығыны 7 млрд доллардан асқанын жазған.
