Қазақстанда үшінші атом электр станциясын салу үшін үш аймақ қарастырылып жатыр: Абай облысындағы Курчатов, елдің батысындағы Каспий теңізінің жағалауы және солтүстіктегі Тобыл өзенінің бойы. Бұл туралы Атом энергиясы жөніндегі агенттіктің төрағасы Алмасадам Сәтқалиев 13 қарашада Анталияда (Түркия) өткен «Әлемдік атом күндері» конференциясында айтты, деп хабарлады агенттіктің баспасөз қызметі.
«Қазақстандағы үшінші атом станциясы үшін бірнеше әлеуетті алаң қарастырылып жатыр», — деді Сәтқалиев.
Тобыл бойындағы алаңды жүйелік оператор KEGOC ұсынған: ол жерде салқындатуға жететін су бар. Үшінші станция үшін орта қуатты реакторлар қарастырылуда. Мұндай блоктар электр энергиясымен қатар жылу бере алады, ал кей жағдайда суды тұщыландыруға да жарайды. Орын таңдағанда электр энергиясын тұтынудың өсу болжамы ескеріледі. Барлық нұсқа келесі кезеңдерде зерттеледі, алаң туралы түпкілікті шешім әлі жоқ.
«Атом энергетикасы адамдар мен планета үшін» атты пленарлық сессияда Сәтқалиев Қазақстан уран қоры бойынша әлемде екінші орында тұрғанын және әлемдік өндірістің шамамен 40%-ын беретінін еске салды. «Біз уранды тек экспорттық тауар ретінде қарастырмаймыз», — деді ол. Оның айтуынша, елге кемінде 100 жылға жететін стратегиялық уран қоры қажет. Бұған дейін Сәтқалиев уран кен орындарының бір бөлігі болашақ АЭС үшін сақталатынын айтқан.
Алғашқы екі станция Алматы облысының Жамбыл ауданында, Балқаш көлінің жағасында орналасады. Біріншісін — «Балқаш» АЭС-ін «Росатом» салады: келісімшартқа 2026 жылғы 3 қыркүйекте қол қойылды, жақында бас мердігер анықталды.
Курчатов пен елдің батысын Сәтқалиев қараша айының басында да ықтимал алаң ретінде атаған. 2026 жылғы сәуірде ол нұсқалар арасында Тобыл өзені ағып өтетін Қостанай облысын да атап өткен. АЭС салуды 2024 жылғы 6 қазандағы референдумда қатысушылардың 71,12%-ы қолдады.
