Инфляция баяуласа да, Қазақстанның ақша-кредит саясаты қатаң болып қалуы керек, ал оны одан әрі қатаңдату мүмкін. Мұндай бағаны Халықаралық валюта қорының Таяу Шығыс және Орталық Азия департаменті директорының көмекшісі Роберто Кардарелли 14 қарашада жарияланған Trend агенттігіне берген эксклюзив сұхбатында айтты.
Қордың ұстанымы базалық мөлшерлеме жыл басынан бері төрт рет төмендегеннен кейін айтылды. Ұлттық банк маусымда мөлшерлемені 1 пайыздық тармаққа төмендетті, 24 шілдеде 16,75%-ға, қыркүйекте 16,25%-ға, ал 23 қазанда 15,75%-ға дейін түсірді. Мөлшерлеме қазір де осы деңгейде.
Инфляция баяулап келеді, бірақ әлі де Ұлттық банктің 5%-дық мақсатынан екі есеге жуық жоғары. Ұлттық статистика бюросының деректері бойынша, 2026 жылғы қазанда бағалар жылдық мәнде 9,2%-ға өсті, қыркүйекте бұл көрсеткіш 9,3% болған. Реттеушінің өзі 2027 жылы инфляция 6,5–8,5%-ға дейін баяулайды деп күтеді.
ХВҚ жазда да осындай ұстанымда болған. 2026 жылғы маусымда Қазақстанға сапарының қорытындысы бойынша қор миссиясы инфляция мақсатқа сенімді түрде жақындағанша «ақша-кредит саясатының қатаң бағытын ұстануға» кеңес берген. «Инфляцияның жүйелі төмендеуі тоқтаған жағдайда ҚҰБ ақша-кредит саясатын қатаңдатуға дайын болуы тиіс», — делінген миссия мәлімдемесінде. Сол кезде қор Қазақстан экономикасы 2026 жылы шамамен 4,6%-ға өседі деп күткен.
Экономика өсуін жалғастырып отыр: 2026 жылғы қаңтар – қазан айларында ЖІӨ 4,5%-ға ұлғайды.
Ұлттық банк базалық мөлшерлеме бойынша келесі шешімді 2026 жылғы 4 желтоқсанда жариялайды.
