Қырғызстанда 13 қарашада түн ортасында президент сайлауына кандидат ұсыну мерзімі аяқталды. Өтінішті 11 адам берді, олардың арасында қазіргі мемлекет басшысы Садыр Жапаров та бар. Бұл туралы Қырғызстанның Сайлау және референдум өткізу жөніндегі орталық комиссиясы хабарлады. Дауыс беру 2027 жылғы 27 қаңтарға белгіленген.
Өтініш бергендер:
- Садыр Жапаров — қазіргі президент;
- Исхак Масалиев — Жогорку Кеңестің бұрынғы депутаты;
- Бактыбек Калмаматов — Жогорку Кеңестің бұрынғы депутаты;
- Сыймык Жапыкеев — қаржы полициясының бұрынғы басшысы;
- Бакытбек Адылов — Мемлекеттік көші-қон қызметінің бұрынғы төрағасы;
- Мамбетжунус Абылов — Орталық сайлау комиссиясының бұрынғы төрағасы;
- Клара Сооронкулова — Жоғарғы соттың Конституциялық палатасының бұрынғы судьясы;
- Азамат Эсенбеков — Шу облысы Мәскеу ауданының бұрынғы әкімі;
- Аймен Касенов, Акай Кыдыров және Амур Айба — кәсіпкерлер.
Соңғы болып, 12 қарашада, ОСК-ға Мамбетжунус Абылов пен Клара Сооронкулова жүгінді. Сооронкулова 57 жаста, ол — үміткерлер арасындағы жалғыз әйел. Ол 2021 жылғы қаңтарда өткен кезектен тыс президент сайлауына да қатысып, 14 005 дауыс, яғни шамамен 1% жинаған.
Өтініш беру адамды бірден кандидат етпейді. Қазір қол жинау жүріп жатыр: әр үміткер 7 желтоқсанға дейін кемінде 30 мың сайлаушының қолын жинауы тиіс. Қолдар «Түндүк» порталы арқылы электрондық түрде жиналады. ОСК тіркеуге қажет құжаттарды 13 желтоқсанға дейін қабылдайды, ал кандидаттарды 23 желтоқсанға дейін тіркеуі керек.
Жапаров өтінішін 10 қарашада берді және екінші мерзімге түседі: Конституциялық сот оның қазіргі алты жылдық мерзімін бірінші мерзім деп есептеді. Кандидат ұсыну аяқталар қарсаңында президент кейбір саясаткерлердің сайлауды бұзу үшін ұлтаралық қақтығыс тұтандыру жоспарын талқылап жатқанын мәлімдеді. Ол бұған дәлел келтірмеді, есімдерін де атамады.
Сайлау Қазақстанда тұрып, жұмыс істейтін Қырғызстан азаматтарына да қатысты. Биометриялық тіркеуден өткендер шетелдегі учаскелерде алдын ала өтінішсіз дауыс бере алады. Сайлаушылардың алдын ала тізіміне шамамен 4,47 млн адам енгізілген.
