Димаш Құдайберген жанкүйерлері Мексиканың Монтеррей қаласындағы көшеде салған өз портреті бар муралды барып көрді. Әнші бейнені Астана уақытымен 15 қарашада кешке Instagram парақшасында жариялады. Жанкүйерлердің сыйына жауап ретінде ол музыкант достарымен бірге қабырға жанында бірден шағын өнер көрсетті.
Бейнеде Димашпен бірге қазақстандық әртістер Темірлан Олжабай, Расул Усманов, Олжас Құрманбек және Ернат Наурыз жүр. Олар әншінің портреті жанында, тура көшеде би билеп, қазақтың ұлттық аспаптарында ойнайды.
Димаш бейненің астына испан және қазақ тілдерінде жазба қалдырды. «Монтеррей, мені сөзбен айтып жеткізе алмайтындай әсерге бөледіңіздер! Осы әсем қаланың көшелерінің бірінде менің бейнем салынған муралды көру — ешқашан ұмытылмайтын сыйлық. Осындай ерекше ықылас пен ыстық сезімдеріңіз үшін шын жүректен алғыс айтамын! Ал біз өз кезегімізде сіздерге менен және талантты достарымнан ерекше музыкалық сыйлық дайындадық!» — деп жазды ол.
Әншінің Instagram-дағы бейнесі:
Алғашқы үш сағатта бейне 19,7 мыңға жуық лайк және мыңнан астам пікір жинады. Әр елдің жанкүйерлері Монтеррейге жылы қабылдағаны үшін алғыс айтты, ал көбі әншіден испан тіліндегі әндерінің студиялық жазбасын шығаруды сұрады.
Димаштың портреті бар мурал Монтеррейде әнші келер алдында пайда болған: жанкүйерлер тіпті оны әуежайда осы қабырғаның суреті салынған үлкен кенеппен қарсы алды. DIMENSIONS турының концерті қалада 14 қарашада өтті, Димаш сахнадан соғыссыз әлемге шақырды. Алда әншінің Гвадалахара мен Мехикодағы концерттері бар.
