Димаш Құдайберген Мексиканың Монтеррей қаласында DIMENSIONS әлемдік турының аясында өнер көрсетті. Концерт 14 қарашада кешке Auditorio Banamex залында өтті, Астана уақытымен бұл 15 қараша күнгі таң еді. Әнші сахнадан көрермендерді бейбітшілікке шақырды, деп жазады мексикалық Hoy Tamaulipas басылымы.
Димаш көрерменге ағылшын тілінде сөйледі. Басылымның жеткізуінше, оның сөзі былай болды: «Мен саясат туралы көп айтқым келмейді. Мен жай ғана соғыссыз әлемді армандаймын, болғаны сол». Әнші миллиондаған бала қалыпты өмірді армандайтынын да айтты. Осыдан кейін соғыстан зардап шеккен балалар туралы «The Story of One Sky» әні орындалды.
Димаш мексикалық көрермендерді испан тіліндегі әндермен қуантты. Ол панамалық композитор Карлос Элета Альмаранның «Historia de un amor» болеросын және мексикалық Консуэло Веласкестің «Bésame mucho» әнін орындады. Әнші залға испан тілінде де жеке тіл қатты: «Монтеррей, мен сендерді қатты жақсы көремін». Бағдарламада «Dimensions», «Olimpico», «Fire» және «Stranger» әндері де болды.
Бұл қазақстандық әншінің Монтеррейдегі алғашқы жеке концерті. Концерт қарсаңында оны әуежайда жанкүйерлері қарсы алды, ал қаланың бір көшесінде жанкүйерлер оның бейнесі салынған мурал ашты.
Димаш Құдайберген — алты октавалық диапазоны бар қазақстандық әнші, қытайлық «Мен — әншімін» шоуынан кейін әлемге танылды. DIMENSIONS турының Латын Америкасындағы бөлігін ол 11 қарашада Меридада ашып, ол концертті балалық арманының орындалуы деп атаған. Мексикада алда 17 қарашада Гвадалахара, 19 және 20 қарашада Мехикодағы екі концерт, одан кейін Богота, Сантьяго және Лима бар.
